Batırmurzayewlanı tuxumu
Yaxsaylı özden Absalamnı eki ulanı bolğan: Nuhay wa Abdulwahap. Nuhaynı Zaynulabid, Abdulhamit dep eki ulanı wa Rafiş dep bir qızı bolğanı da belgili. Zaynulabidni qısmatı haqda köp aytılğan wa yazılğan. Ol, pahmulu wa qorquw ne ekenni bilmeygen 22 yıllıq cahil ulan, xalqın nasipli wa erkin etemen degen oy bulan yabuşup, ölüp getgen. Özü ölgenden berli 100 yılğa yuwuq bola busa da, onu atı hali de xalqını esinden taymay wa yañı naslulağa ülgü bolup tura. Zaynulabidni qaburu Adilyañıyurtda.
Zaynulabidni inisi Abdulhamit de oxup, atasını wa ağasını yolunda çalışıp, alim bola. Qumuq tilni grammatikasın, oxuw kitaplar yaza. Paçalıq işlerde de üstünlüklege yetişip, Dağıstannı Ör Sovetini Prezidiumunu yürütüwçüsü bolup işley. Ol, 60 yılına da yetmeyli, xaparsızdan çaqsız öle. Abdulhamitni de Zaynulabid, Ziyawdin dep eki ulanı wa şolay da eki qızı bolğan. Zaynulabid orus qatın alıp, bir neçe yıllar Anciqalada yaşağan soñ, Belarusğa göçüp, hali onda yaşay. Ziyawdin de orus qatın alıp, Moldowada yaşağan wa şonda ölgen. Olanı awletleri bulan da qardaşlarını baylawluğu yoq.
Rafişni haqında ol Qazma yurtğa erge barğanından qayrı bizde dağı maʼlümat yoq. Küyge qarağanda, ol da uzaq yaşamağan.
Nuhaynı inisi Abdulwahapnı Nizamdin, Paççaxanum, Salimaxanum degen awletleri bolğan. Nasipge, olanı awletleri wa awletlerini awletleri de bizin arabızda yaşap tura. Dağıstannı xalq şairi Muhammat Atabayew – Paççaxanumnu ulanı. Belgili alim, geologya-mineralogya ilmulanı doktoru Anwar Batırmurzayew misgin de – Salimaxanumnu ulanı. Anwar geçingen gün onu ulanı Ullubiyge ulan tuwup, oğar da Nuhaynı atın qoyalar.
Nizamdinni ulanı Umarpaşa Batırmurzayew hali-halilerde tuxumuna wa qardaş-qurdaşına bağışlap «Öktemmen sizin bulan» degen kitabın çığardı. Dağı da Umarpaşa inileri bulan Adilyañıyurtdağı Zaynulabidni taşlanğan, buzulğan esdeligin yañırtıp, maqtawlu tuxumunu atın dağı da ör etdi.