Maclisni wa aşaw-içiwnü edepleri✻
Maclisge çaqırılğanda bek geç qalmağız. Bu, çaqırğan gişige tergewsüzlükge tüz etedir. Aşnı bek alğasap aşamay, saburluq-haybatlıq bulan aşağız. Şorpa içegende awuzuğuznu şapırlatmağız. Boşğabığızda qalğan şorpanı qaytarıp xumağa (sawutğa) boşatmağız. Şorpa içegende terlesegiz, terigizni tastımal✻, yada qaptal-çepkenni yeñi bulan sibirmegiz. Burnuğuz yumşasa✻, içine bağıp tartmağız, qolyawluq bulan tawuşsuz-zatsız işni bitdirigiz.
Boşğapdan, xadiradan aşayğanda burnuğuznu tığarday bolup bek iyelip aşamağız. Etmekni✻ xabıp aşamağız, sındırıp aşağız. Awuzuğuznu bek tolturup xapmağız. Çaynayğanda awuzuğuznu şapırlatmağız.
Awzuğuzda aş bar zamanda gişi bulan söyleşmegiz✻. Aşayğanda kekirmekden were✻ bek saqlanığız, başğa xalqlanı arasında bek ayıpdır.
Tastımalığıznı (salpetkeni) yağağızğa qısdırıp, boynuğuzğa da salmağız, tüymegizge qısdırıp, kökregigizge de salmağız. Tobuqlarığıznı üstüne salmaq tamanlıq eter. (Har birisini sebebi bar. Munda yazsam, uzun bolajaq). Aldığızğa salğan süt yimik ap-aq tastımallağa (salpetkelege) qoluğuznu yada awuzuğuznu sürtmegiz. Awuzuğuznu-qoluğuznu sürtmege tarıqlı bolmayğan küyde taza aşağız.
Alä-franqa yaʼni✻ Yawrupa adatı bulan tartip✻ etilgen maclislerde bolğan zamanda, üynü yesi çaqırmay turup, qatınlar bosa✻, alar✻ olturğançağa awwal✻ maclisde olturmağız. Maclisdegi qatın-qızlanı betlerine bek tergep tuwra qaramağız. Aş gelgende başlap qatınlağa almağa qoyuğuz. Qatınlar bulan bir maclisde bolğanda, awuzun yumup bir de söyleşmey turmağa gelişmey. Eger olar qabul etejegin bilsegiz, qatınlanı kepi gelir yimik [bir] ariw masxaralar etse de zarar✻ yoq.
Biçaq-şişni✻ qollanmaqğa✻ da bek tergew etigiz. Biçaqnı oñ qolğa, şişni sol qolğa tutmağa gerek.
Balıq aşayğanda, biçaq bulan aşamağız. Et gesegende, tirsegigizni çarxığızdan ayırmağız, xonşuğuzdağı gişige oñaysızlıq etmesin. Aşnı arasında bir zat içgende burnuğuznu sawut(ğa) yada istakanğa tiydirmegiz.
Yemiş-zat aşayğanda qaşıq qollanmağız. Boşğabığızdağı şorpanı art tamıçı bitginçege içmegiz. Aldığızdağı ekmekni soñğu✻ gesegi bitginçege aşamağız. Boşğapnı ya awuzu bulan, ya barmağı bulan yalamaq – başğa xalqlanı arasında bek ayıpdır.
Yemiş✻ aşağanda, süyegin✻ qaşıq bulan alıp, boşğapğa yada aşyawluqğa salığız. Awuzuğuzdan qoluğuz bulan almağız, yada awuzuğuz bulan atıp yibermegiz, yanığızdağı gişini rahatsız e[tmek]den saqlanığız.
Bir zat alajaq bolup gişini boşğabını üstünden sozulmağız. Ep bola turup, yanığızdağı gişige qulluq buyurmağız… Bir gişige söyleygende ekinçisine artıñnı bermegiz.
Barmağığız bulan görsetip bir zatğa işara etmegiz. Aşyawluqdağı bir zat bulan oynamağız.
Uyalağan bolup, nazlanağan-tartılağan✻ bolup, adamlağa külkü bolmağız, açıq-erkin görünügüz.
Aşayğanda biçaq, qaşıq, şiş yimik zatlanı qoluğuzdan qutultup yerge tüşürmegiz. Nagäh✻ bilmey bulay bir iş bolsa, anı✻ sürtüp tazalayman dep aylanmağız. Başğasın aytıp alığız.
Şanjalnı artına yatıp olturmağız. İstolnu üstüne tirseklerigiz bulan tayanıp turmağız.
Bir maclisge barajaq zamanığızda soğan, samursaq yimik yaman iyisli zatlar aşamağız. Aşatmaq-içirmek uçun musafir (qonaq)larığıznı artıq qıstamağız. Qatınlardan aldın maclisden qozğalmağız✻.
Bir maclisde miʼdağıznı (aşqazanığıznı) buzuqluğundan, yada geltirgen aşnı awur siñegeninden laqır etmegiz.
Aş aşayğan üyge olturmağa çıqğanda, qatınlağa [oñ] qoluğuznu berigiz, olturtağanda da oñ yağığızda olturtuğuz. Aşdan soñ, üynü yesine yada qatınına bek artıq razilikler berip, yada aşların maqtap bek xamlıq görsetmegiz. Tek özler bulan görüşmeklik sebepli bek şat bolğanığıznı belgili etigiz. Qonaqda turağan zamanığızda, yada paraxot✻, temir yol, ğastinisa✻ yimik yerlerde çeçinip gölekçen✻ olturmağız.
Aşayğanda-içegende bek qıçırıp söyleşmegiz. Yanığızda gişi bar zamanda, aşaw-içiwnü waqtisinde bir zat oxumağız. Aş tamam bolmay turup getmegiz.