⁂
«Batırmurzayewnı anası şundamı?»
Bolşevikler Yaxsayğa girgendoq şolay sorağan. Olardan beş wakil meni üstüme gelip, mağa qayğırışdılar. «Seni ulanıñnı qanın alajaqlar bizbiz» dediler. Olanı birsi de busurman tügül edi. Özünü tilinden-dininden bolmağanlardan da qardaşlar tapğan alay ulan bar edi sağa ol.
Şo zaman Zaynulabidni paşman süldürü göz aldıma gelip, tez tayıp qaldı. Bulanı arasında özü yoqğa bolğan bolajaq o.
Yaxsayda men bir keren qatınlağa soradım:
– Ullu borannı süyermidigiz, iqğa girmege süyermidigiz? – dep.
– İqğa girme süyer edik, – dediler.
– Bolsa, girigiz kolxoznu qapusuna – dedim. Şolay, kolxozğa canım bulan girgen gişimen. Hali Zaynulabidni inisi şaharğa gelgen soñ, onu yaşlarından ayrılıp bolmay munda qalıp turaman. «Balanı balası baldan tatli» degen zat bek gerti zat eken, onu gertiligin sınamağa mağa yimik, ya Allah, sizge de nasip bolsun.
Bolsa da otbaşnı sağınaman. Şo sayalı bu elektrik peçni eki de tobuğuma yuwuq etip olturğanım da.
Göresiz bu üyleni. Bir beti Tarğu tawğa baqğan, bir beti Anci deñizge qaray. Amma üçünçü qabatda busaq da Tarğu taw görünmey. Nege tügül qarşıbızda o tawdan biyik bolup etilgen qalalar bar. Olarda Zaynulabidni İwan, Mahamma, Amarsu, Abram qardaşları yaşay. Amma deñiz çi gömmek – gök bolup görünüp tura dağı. Nege tügül onu yağasında uzun baw bar. Onda neçe türlü çeçek bar. Olar da güntuwğan çeçeklege, iwan melewşelege, dasi güllege oşay.
Anasız Zaynulabid, sen tirile busañ, men ölmege razi edim.
Tek şu balamnı balalarından neçik ayrılayım, şulay Zaynulabid yimik ulanlar bolup bitse, soñ çu ölsem de qayırmay edim.