Oramnı edepleri
Gişige urunup yığılarday yada yığarday darajada alğasap, tergewsüz yürümegiz. Nagäh yañılış birewge urunsağız, geçmekni talap etmekni✻ bir de unutmağız. Munu uçun türkçe-qumuqça – «afu etigiz», «geçigiz», yada «bağışlağız»; orusça – «winowat», pransuzça✻ – «pardon» deyler.
Toqtap bir gişini [artından] qarap qalmağız. Heç bir gişini, ayroqda qatın-qıznı yüzüne tiklep qaramağız. Heç bir gişini opurağı, kebi✻ bulay dep mısğıllamağız.
Tayağığıznı yada günlügügüznü✻ hawada aylandırıp yürümegiz, yada qoltuğuğuzğa qısdırıp, gişige tiydirmegiz. Oramda yürüygende eteklerigizni sallandırıp, başığıznı enkeytip, qaburun izleygen gişi yimik bir misgin suratda yürümegiz. Oramda yürüygende qaqırmağız, tükürmegiz, burnuğuznu sibirmegiz.
Oramnı ortasında yada trotuarnı üstündegi girip-çığıp yürüygen bir qapu(nu) yada eşikni tübünde toqtap söyleşip turmağız. Söz söylemek uçun qatınlanı oramda toqtatıp turmağız. Söylejek sözügüz bolsa, biraz uzatıp, yürüp söylegiz.
Barğanığıznı ariw görejegin bilmey turup, gişini üyüne barmağız. İşleygen zamanında gişini toqtatıp söyleşip turmağız.
Sebeplerin belgili etmey turup, dosuğuzdan ayrılmağız. Heç [gişini], ayroqda qatın-qıznı sırın bilmek uçun qanıqmağız; eger özler söyleseler, heç gişige yaymağız. Sır saqlawnu muqaddas✻ bir borç dep biligiz.
İsbayı küyde bolaman dep, adamnı külküsü gelegen işleni etmegiz. Tyatırğa✻ barğanda, oyun başlanğandan soñ tawuşuğuznu çığarmağız. Perde tüşgünçege tyatırdan çıqmağız.
Fahişalıq✻ etegen musliman qızlanı görüp tergew alığız, alanı yüzde toqsan beşi✻ – erlerini zulmusu, cahilligi✻ sebepli şo halğa tarığanlar. Ağar✻ göre, qatınlanı haqında bek yazıqsınağan bolup, adillik görsetmege qast etigiz.