Mutarjimden✻ bir eki söz
Marhumnu tarcumahalın yazağanda, suratı göz aldıma tasawwurlanıp✻, tez tayıp getgendey bolup, yüregime türlü hallar geldi. Bu ayawlu yoldaşım wa meslekdeşim✻ muratlarına yetişmey, tez zamannı içinde dünyadan getmegi esime tüşüp, şu yırnı✻ o[r]talıqda söylemege majbur boldum✻:
Pasih edi Farazdaqdan✻ har sözü, Yazıq xalqdı har daiman oñ gözü. Qardaş-qurdaş, dos-yuwuq dep ayırmay, Barın birde[y] teñ göredi ol özü.
Tabiatı daim teñlik süyedi, Bay-yarlı dep başğa gözden qaramay. Heç bir işde yañız pikru tutmadı, Haqılı bulan ilmusuna soramay.
Pikrusuna tüz haqılın yoldaşlap, İş göredi xalqnı ilmulu etmege. Namusların malğa satğan namartlar Qoymadılar muradına yetmege.
Hurriyatnı✻ nürün görme süyedi, Qara xalqğa tiyermi dep yarıqlıq. Anı yimik hurriyatçı şairge Bugünlerde gelip qaldı tarıqlıq.
Ol itelgi quşday turğan erleni Qadrin✻ bilmey, yoqdan yalayabalar. Tarıqlı gün gelejegin oylamay, Uçurğan soñ tişnep barmaq xabalar.
Duşman da izley anı bugün, dos da izley, Bugünlerde tarıqlığın bilgen soñ. İş ozdurup qoldan pursat✻ getgende, Yoqnu izlemek bolurmuken endi oñ?
Abdurraşit Yaxsaylı, 26 may 1926