Yazğan paqırnı münajatı✻
Ya Allahım, Sen geçgin Günahlarımdan meni, Başğa assilik etsem de, Gerti birleymen Seni.
Dünyada rahatlıq ber, Qıynap alma canımnı, Axırğı nafasımda✻ Yoldaş et imanımnı.
Yılap qapuña geldim Men, bir yazıq gunahlu✻, Cahannemden qorqaman, Tügülmen cennet ahlu✻.
Cennet umut etemen, Betim çi barmay aytma. Allahım, Sen nasip et Nasuh✻ tawbağa qaytma.
Qıyamatgün Mahşarda Oñdan ber kitabımnı, Ayiplerimni✻ açma, Yeñil et hisabımnı.
Habibiñ hürmetiçun, Tutma meni azapğa, Sen mağa göre bolma Barğan günde hisapğa.
Fazla karamıñ✻ bulan Yazıqsın men paqırğa, Men bir assi quluñman – Rahmuñdan quwma qırğa.
Rahmuña umut bulan Assilik etdim Sağa, Ğafurun✻ ham Rahimsen✻, Açuwlanma Sen mağa.
Balahlarıñdan saqla Eki dünyada meni, Geñ bolğan rahmatıñdan Bir zat kemimey Seni.
Qıyamatgün bolğanda Yarıq etgin yüzümnü, Rasulnu görmeklikden Mahrüm etme gözümnü.
Gene geç günahından Atam bulan anamnı, Alağa Sen nasip et Cennet Darussalamnı✻.
Dağı da Sen yazıqsın Qawum-qardaşlarıma, Qıyın-tınçda tabulğan Yuwuq yoldaşlarıma.
Rasulnu ümmetine, Sawuna-ölgenine, Allahım, Sen yazıqsın Dünyağa gelgenine.
Barına da nasip et İman bulan ölmekni, Maşharda payğambarnı Nürlü yüzün görmekni.
Eki dünyada oldur Alamlanı soltanı, Bizin mahrüm etme Sen Şapaatından anı.
Ya Rabbi, Sen rahmat et Abubakar, Umarğa, Osman, Hamzat, Abbasğa✻, Hasan, Husayn✻, Haydarğa✻.
Allahım razi bolsun Anı çehar yarına✻, Muhacirge✻, ansarğa✻, Başğa ashaplarına.
Qısğartıp qumuq tilde Yazdım Rasulnu halın. Yazma güç yetişmejek Qoymay kitapda barın.
Rasulnu halın yazdım Artında qurman aynı✻. Anı şapaatından Mahrüm etme Nuhaynı.
Salat salamlar bolsun – Rasulğa, ahlusuna, Sıylı ashaplarına, Yaşına-ullusuna!
(«Bu cıltnı içinde üç başğa zat bar: Nazmul-käläm. Mawlid. Miʼraj» degen kitapdan. Temir-xan-şura, 1909 y., s. 6-12). «Mawletni» metinin acamçadan haligi qumuq yazıwğa göçürgen, oğar bayanlıqlar wa añlatıwlar yazıp oñarğan – Hasan ORAZAYEW