Rasulnu alayhissalam qazawatları
Tuwup ösgen yerinden Köp süymey ayırıldı. Madinağa göçgen yıl Qazawat buyuruldu✻.
Daw etmege gerekni Ashapğa malim etdi. Suwsap turğan✻ ulanlar Artğa qaramay getdi.
Qatını-qızı bulan Bek şatlanıp getdiler, Rasulnu süygenlikden Canın qurban etdiler.
Açbız-yalanğaçbız dep Dünyağa talçıqmadı, Özünü paydasıçun Anı sözün yıqmadı.
Yırtıllayğan qılıçlar Har birini qolunda – Müşrik neçik çıdasın Arslanlanı yolunda?!
Cıyılğan köp müşrikge Biri girse bulanı, Aç börü girgen qoydey Ete edi olanı.
Arıdım dep qılıçın Qınına salmay edi, Dünya tolğan köp müşrik Bet berip bolmay edi.
Rasul «otğa tüş!» dese Heç geri urmadılar, Müşrik köp bolğan uçun Betlerin burmadılar.
Tuyağından ot çığıp Dawğa mingen atları. Din uçun çalışğanlar, Mal tügül muratları.
Awwalğı qazawatı – Badruda✻ etgen dawu, Müşrikleni köp qırdı, Geri qaçdılar sawu.
Abujahal-malʼunnu Şo dawda öltürdüler, Ashaplar Madinağa Köp tonaw geltirdiler.
Quwwatlana başladı Andan✻ soñ busurman din. Ne hilla etip, müşrikler Tawup✻ bolmadı ebin.
Dawlarda maläyikler Bulağa kömek berdi; Neçe müşrikler, görüp, Musliman dinge girdi.
Hijratdan üçünçü yıl Uhudda✻ daw etdiler – Ashap, yaşı-ullusu, Biri qalmay getdiler.
Hamuzat✻ şahid boldu Uhud qazawatında, Xaparsız urdu oğar, Yaşınıp taşnı artından.
Etgen qazawatların Aytsa, uzaq bolajaq, Qoymay barısın yazsa, Neçe kitap tolajaq.
Badru, Uhud, Mustaliq, Bani Qurayza, Xaybar, Xandaq, Taʼif, Hunayin, Fathu Makka✻, dağı bar.
Özü qoşulup barğan Qazawatları – şolar. Bulardan başğaların Etgenler ashabalar.
Salat salamlar bolsun – Rasulğa, ahlusuna, Sıylı ashaplarına, Yaşına, ullusuna!