⁂
«Ulanını yağına getgen atası da». Yaxsaynı tükençilerini, yer yessilerini süyünçü şolay bolğan.
Şonu men eşitgende, haldan tüşgen qarqaram canlandı. «Süyegimni cıyarsan» degen wasiyat esime gelip boldu sağa o.
Quturğan itden neçik qaça adam? Eki de ölüm, yaxsaylanı Batırmurzayewlardan şolay qaçağan etgen edi.
Eki kiyiz de eltgenmen, bir bel de eltgenmen (Zaynulabidni üstüne yabılğan yamuçu da bar). Özüm bulan, kömekge inamlı xonşum ayawlu Catükeyden qayrı dağı da bir adam da alğanman.
O da Yaxsayda yaşayğan amalsız noğaylı Bammet edi.
Ol yaşırtğın kağızlanı çırmap, aqçalıqnı içine de salıp Noğayğa yayğan, Zaynulabidni adamı Saypullağa kömekçi bolup da yürügen edi.
Süyekni eltmek uçun da polkownikden ixtiyar tarıq eken. Ixtiyarsız urlap alıp getmege, olar qayda ekenni de bilmeymen.
Bayağı vagondağı ştabğa girip tilmaçdan taba polkownikden propuska tiledim.
– Kimdir o? – dedi.
– Arslanmurzayew – dedim.
Polkownik Zawelin gözlerin araltıp, istolğa yumuruğun urdu.
– Batırmurzayew sama tügülmü? – dedi.
– Batırmurzayewlardan Allah saqlasın. Meni erimni, yaraşıwluq bayraq alıp çıqğanda yañılışlıq bolup öltürgen – dedim.
– Seni eriñ Batırmurzayew bolğan busa, men sağa etegenni görer ediñ, – dep qolun tapançağa eltdi…
Tutulğunça aldındağı gün giydirgen çorap görünüp qalmağan busa, umut üzüp qayta tura edim. Maşin yolnu tübündegi bir töbeni yağında eki çorapnı birisi tabulup qaldı.
Biz töbeni qaçmağa girişgende, bronewik poyezd yetişip gelip, bizge gülle yawdurmağa girişdi. Yer bawurlap biz de yatdıq, bronewik de ötdü. Yegilgen atlanı birisine gülle tiygen edi.
Bir çoñurğa yetti süyek taşlanğan edi. Barısı da et yalanğaç ediler. Onça da tonağan edi olanı.
Başlapğı süyekni başından tutup götergende, başı qarqarasından ayrılıp qoluma gelip qaldı.
Tiygen gülleni köbünden onu boynu qırqılğan bolğan eken.
Hamitni süyegin uzunluğundan tanıdım. İñ de uzun süyek – Uzun Hamit edi. Onu qoyup getmege amalım yoq edi. Zaynulabidni atasını süyegin qaburğasındağı esgi xınjal yaradan tanıdım. Yoğese yetti de süyekni bir arbağa yüklemege tüşejek edi.
Geçe, ulanına qazılğan qaburğa atasın gömüp tügül yurtğa girmedim.