Baş söz
Bir neçe yıllar aldın mağa ana tilden, adabiyatdan dars beregen muallimleni darslarında bolmağa tüşdü. Meni nasibime yaş muallimlege Yırçı Qazaqnı «Getgenibiz gökşa maral güz edi» degen şiʼrusunu bir neçe sözlerini maʼnasın añlatmağa tüşdü. Darsdan soñ etilegen bahalaw analizni waqtisinde, işni natijasın çığarağanda, şo yırdağı bir xıylı çet sözleni maʼnaların muallim özü de bilmeygeni ayan boldu. Munda yañız muallimleni xatasın görsetmek degen oydan, muratdan köp arekmen.
Aytağanım, har muallim işine neçaqı qastqılıp hazirlik iş görse de, kömekçi usul (metod) görsetiwler, qoşum adabiyat, bilimlerin kämilleşdirme bolarday axtarıw ilmu maʼlümatlar qolda bolmasa, kütülme gerekli işler de alğa yürümes. Şo yanından alğanda, İbadulla Hacini «Yırçı Qazaqnı asarlarını sözlügü» degen kitapçası muallimlege stol kitabı bolajaqğa şeklik etmeybiz. Muallifni bir-bir sözlege berilegen bayanlıqların tolu küyde qabul etmesek de, bar küyde, almaşınıwlar etmeyli bermekni maslahat gördük. Sebebi: qoy, yaratıwçu qaydada işleygen muallimler de, bu kitapnı haqında öz oyların, pikruların aytar wa şolluqda kitap ekinçiley, üçünçüley qaytarılıp, tolumlaşdırılıp basmadan çığar.
Ata-babalardan «asrular sözge gelgen» aytıwlarıbız, atalar sözleribiz de bir günden, bir yıldan cıyılğan til baylığıbız tügül. Tek neçik bolsa da, yañılıq izlewçü İbadulla Haci etgen işni tuzu-burçu, cıjığı barlığı bizin süyündüre, nege tügül, alimler tartma bolmasday arbağa yegilgen axtarıwunu yazıwlarını xayır paydası tilni üstünde işleygenlege, muallimlege, ayroqda yaş naslunu wakillerine tiyejegine haq inanabız. Şolay bolğanda milli maşğur şairibiz Yırçı Qazaqnı yırları bulan yanaşa kitap oxuyğan har qumuqnu stolunda İbadulla Hacini bu kitabı da bolajaqnı birew de inkär etip bolmas.
Maharram Alimhaji.