«Batman-batman bal içip…»
Aşap toyup bolmayman Terekdegi badamnı. Men seni qaydan süydüm Tanımayğan adamnı.
Al soqdum, yaşıl soqdum, Kökde mezgil ilmesin. Süymeklik qıyın eken göñüñ de külemesin.
Sen aysan, men - yulduzman, Sen quransan, men - cuzman. Bir işler bolup getse, Sen buzmasañ, men buzman.
Batman-batman bal içip, Başı aylansın biyleni. Orta arqalığı sınsın Sen girmegen üyleni.
Tawlanı başı tala, Sürüngenler gök-ala. Seni ayday yüzüñe Qarap çarxım kep ala.
Hasiret edim sağa Almalı bawğa yimik. Arqam tayağan edim Awmayğan tawğa yimik.
Altı tawnu artında Gülhan, baʼli baw edim. Sen esime tüşgende Bulut bürkep yawa edim.
Barmağımda örmekçe Qaşı pereze yimik. Sındırdıñ yüregimni Şişa tereze yimik.
Sandıq başda altı alma, Al almanı birisin. Sal qoluñnu töşüme Sen salğan buz irisin.
Yürüygeniñ yol busa, Basğanıñ xola busa, Buzar ediñ dünyanı, — Aytğanıñ bola busa.
Taw arası tarmıken, Tawğa yawğan qarmıken, Şu dünyanı üstünde Bizdey bolğan barmıken?
Dünyalar dünya tügül, Dünyalar bolsun pana. Qaşıñ bulan gözüñnü Arasında nür yana.
Taw biyik, tawxana tar, Yüregi cawhar, sözü qar, Yüz erkekler bahası Bir aytağan sözü bar.
Deñizde teren qollar Onu men boylamayman. Bir seni süymeklikden Axırın oylamayman.
Adamlar bizin söyley, Söylese de qayırmas. Ekibiz de bir bolsaq, Bizin gişi ayırmas.
Ekibiz de bir edik, Bawğa bitgen gül edik. Duşman girdi arağa, Biz şulay tügül edik.
Baw nedir, baxça nedir, Bağırsız taxça nedir, Qız süyegen ulanğa On tümen aqça nedir?
Batman – giççi aqçalıq (cestänoy kuwşin dlä noski wodı).
Badam (yemiş) – mindal.
Cuzman (cuznama) – yulduz kitap, qısmatın aldanoq açıp beregen kitap (astrologya).
Çarx – san, qarqara (telo).
Gülhan – uwaq baw harmut.
Tawxana – tam taxça (munda busa tawnu tar känzileri (stupeni) demek. (Tam taxça yimik etilgen peç – kamin A-Q. Abd.).
Taxça – polka.
Yüregi cawhar – yüregi cawharday yaʼni taza yürekli.
Sözü qar – sözü qarday suwuq, yaman.