«Çubarala tastarıñ»
Çalğan bulan çalğı ötmey, Çalparnı yebelegi, Aylanıp gel şanjalğa Cennetni göbelegi.
Awruyum awruwuñdan, Öleyim accalıñdan, Yaş canım qurban bolsun Olturğan şanjalıñdan.
Mükürqaqda indır bas, Çalparda saban hayda, Sözüñe bağana yoq, Allah, yüregiñ qayda?
Ay tuwar Anci betden, Geme gelir Derbentden, Sen mağa gerek ediñ, Bolur-bolmas cennetden.
Qaraman töbelege Qarşı olturğan Borağan, Birgine-bir sen barsan Meni gözüm qarağan.
Geme gelir Giländan, Daray biçiler enden, Heç amalım bar busa, Ayrılamedim senden.
At çapdım Ayman tüzde, Atım cuwdum deñizde, Ay artılıp getginçe, Aylanıp gel sen bizge.
Alma bawda almalar, Damahım gele meni, Sen mağa qaramaysan, İmanıñ bitgir seni.
Çubar ala tastarıñ Çum terekge ilip qoy. Çaq ayaz gün çıq gelse, Sağınğanım bilip qoy.
Aq kapotuñ kir bolup, Cuwma barğır köllege, Altından yañur yawsun Sen gelegen yollağa.
Ay tuwar Anciarqada, Yol alğır yarığına, İzlese tabulmaysan, Adamnı tarığına.
Tatawullar yırılıp, Tarlawlanı suw alsın… … …
Gül aylan güzgü xalta, Günden-gün zarım arta, Güldey çarxım puç boldu Sen qol silley, men - yorta.
Geçe yawğan göbük qar, Gölegiñni yeñi tar... Hay-hay öktem bolursan - Qalamday qaşlarıñ bar.
Gözleriñ gökdür seni Gök balawuz uwğanday. Bir balayıq, ariwüm, Bir anadan tuwğanday!
Otbaş alda olturup, Kesewlerin işırıp, Tiymegir busurmanğa, Öltürersen bişirip.
Geçeler ayaz-ayaz, Haykeliñe meni yaz, Yuxlayım quçağıñda, Uyanayım dağı yaz.
Geçeler getdi menden, Gözüm toymadı senden. Yaz yemişden toymağır, Nege tez toyduñ menden.
Ekibiz de bir edik, Bawğa bitgen gül edik, Duşman girdi arağa, Biz şulay tügül edik.
Geçeler ayaz bolsun Geleşmişi barlağa. Günleri tuman bolsun, Meni yimik zarlağa.
Qara bolur taw yüzüm, Tatli bolur bişgende, Çıdamağa bolmayman Sen esime tüşgende.
Way-way aman, way aman, Way amannı günleri, Netse çeçiler eken, Yürekni tüyünleri.
Çubarala tastar – türlü tüslü (platok pöstrogo sweta).
Çalparnı yebelegi – çalpar awlaqnı qattı yebe otu.
Mükür qaqda indır bas – Giççi Ancini qırıyında bolğan tarğulanı awlağı, Manas boyu. (A-Q. Abd.).
Gilän – İrandağı Xazar deñizni yağasındağı şahar.
Ayman tüz – geng tüz awlaq.
Damahım gele – munda: kepim gele, uşataman demek.
Çaq ayaz gün – açıq, tek suwuq gün.
Zarım arta – dertim, qayğım arta.
Haykel – bitik (amulet, obereg).