«Hey, ulanlar, ömürügüz oñ getsin».
Hey, ulanlar, ömürügüz oñ getsin, Oynay-küley gezmede gözel gün yetsin. Sizin yimik qurdaşlardan ayrılıp, Bizdeyleni günü de tuman muñ getsin. Enni bizge günler qayda tumansız, Ölsek qıyın şu gawurnu qolunda Sadağasız, ay ağalar, qurbansız. Şat etmejek it gawurlar canlanı, Şabahatlı şawxal biyden purmansız. Şawxal biyim, xas yüregiñ xırs etip, Açuwlandıñ, nege bulay şamlandıñ? Geldik qaytıp, getdik busaq ters etip. Türtüp-soğup nege saldıñ ters yolğa Gözübüzge gül awlaqnı görsetip?.. Gül awlaqlar külü busa yarmıken, Kür ulanlar küley turup barmıken? Atabaynı ayı-günü yollu dep, Qazağıma qara qayğı boldu dep, Teñlilerden tezden getmes zarmıken?.. Tığırıqdan teñ gezesin çeñliler, Çepgeni çerges, biçimi yırıq yeñliler. Teñli ulanlar şu yırlanı aytğanda, Tıñlap gözyaş salsın gözel eñliler.
Gezme – yıbaw (gulänye).
Muñ – tuñ, paşman, talçıqlı.
Gawur – busurman tügül, başğa dinli adam (inoweres).
Qurbansız, sadağasız – ülüşsüz (bez podayanya, bez pojertwowanya).
Şapahat – sawğat, yaxşılıq.
Purmansız – ixtiyarsız, iznusuz.
Xas, xasa yüregiñ – taza yüregiñ.
Xırs etip – ters etip, ters tutup.
Şamlanmaq – belsenmek, ruhlanıp, açuwlanıp, çalt iş, hazirlik, harakat görmek.
Kür ulanlar – şat, quwnaq, quwzaq ulanlar (bodrıye, smelıye).
Tezden getmes zarmıken? – tez taymas, unutulmas dert, talçıqmıken?
Tığırıq – proulok, tupik.
Teñ gezesin çeñliler – teñliler, üyürler, çerler qıdırsın (pust parı molodıx guläüt).
Çeñliler – üyürler, çerliler (parı).
Teñli ulanlar – bir çaqlı (swerstniki).
Çepgen – çerkeska.