Muallifden
Maqalämnı artında Yırçı Qazaqnı yaratıwçuluğunu haqında wa onu qumuq adabiyatda görmekli ör yeri, qumuq tilni ensiklopedyası darajadağı leksikası tilibizni saqlanıwu wa ösüwü uçun paydasını ahamiyatın taşdırmağa süyemen wa şairni öz milleti uçun zor ullu-üyken warisligini xadirin bilip, gelejekde de iş görmekni yorayman.
Şairni enniden soñ çığajaq kitabında şu ördegi esgeriwlege ahamiyat berip, tiyişlilerin qollap, tiyişsizlerin geri urup, inkär etip çığarsa, kitabı bir xıylı kemçiliklersiz bolar edi.
Halige yerli şairni çıqğan üç-dört kitabı, aytarday, onça gölemli de, tolumlu da tügül. Yırçı Qazaqnı asarların barın da cıyıp-terip, foliant qaydada, san mujalatlı, san kağızlı, kitapxanalarıbıznı iñ bezençli ibratlı ülgüge layıqlı bolğannı süyer edik.
Soñ da taklifim: şo kitapnı bolğan çaqı görmekli, foliant ölçewde etmek uçun: şairni özünü asarlarından qayrı da, oğar bağışlanğan Anwar Hacini, Badrutdin Muhammatnı, Ahmat Caçaynı, hatta lezgi şair Hüseynni «Yırçı Qazaq» degen dastanın wa özgeleni şiʼruların, dastanların giyirmek yaxşı bolar edi.
Onu yaşaw yoluna wa yaratıwçuluğuna bağışlanğan maqalälanı, monografyasın wa iñdesi, şonu başında iñ başlap M. Osmannı Qazaqnı birinçiley basmadan çığarğan asarların ayrıça bermeklik tolumlu da, asuwlu da bolar edi. Ozoqda, onu asarlarını tolumlu wa kämilleşgen sözlügün bermeklik aslu talaplardan biri.
Şolay ör darajada qıymatlı kitapnı çığarmaq uçun aslam aqça mayası bolma gerekni de añlaybız. Şonu toplamaq uçun har qumuq ojaq şairni fonduna birer miñ yiberip qoysa da, şo masʼalä ariw çeçiler edi dep oylaybız.
Men wa barı da Yırçı Qazaqnı süyüp oxuyğan oxuwçular şairni şolay yañı kitabın çıdamsız qarawullaybız, şonu görmey birewü dünyağa getip qalarıbızdan da qorqabız. Yaxşı yorawlarıbız, amin Allah, yaşawğa çıqma nasip bolsun!
Bir xıylı qumuq muallimleni wa sayaw oxuwçulanı atından pensioner muallim İbadulla Haci.
Şu sözlüknü tiziwde öz boluşluqların etgen Muhammatşapi Minatullağa, Supuyaxanum Biybolatğa, Musapir Batırğa, Abakar Yusupğa, misgin Muhammat-Hanipa Aqayğa haq yürekden raziligimni bildiremen.
Xasawyurt şahar.