«Känt ete dep ayıp etme yaramas».
Didarlar tizge, tiz gözge, Tabuşarmı, yıllar yetmey miñ yüzge? Aylar, yıllar, cumalar, soñ çars günler, Aylanıp tez qoldan çıqdı xas günler.
Xasa günler xars ura edi yır bulan, Şawla berip artıla edi nür bulan.
Ömürübüz getermiken şu küyde, Bir içmeyli içler tolğan çer bulan?
Ömürübüz bulay getse qıyın bar, Ölgünçege esden taymas tüyün bar.
Tüyünübüz çeçilmesdey çort bolğan, Kökürekden getmes yimik dert bolğan.
Dert getermi – tüyün taymay yürekden, Şınjırlı buğaw taymay bilekden?
Şınjırı şılbır, şek-şegine mataylar, Günleri güyez, cuması yıldan öte aylar. Butların buğaw, qolların şınjır şişdirip, Quwday aq betin günler bişirip, Atabaylağa yol boray bitgen altı aylar, Yolları zaqum çekdire getgen sant aylar. Sant aylanı günleri gümüş çortlağa. İlbisleni inçe belin sındırıp. Şaytanlanı şat etmeygen nartlağa… Şaytanlanı şat yüregi yarılır Qayğılı gün känt etmesek yatlağa. Yatlağa etmey, kimge eteyik käntlanı, Burma buğaw awur bola butlağa. Butlarıbız burma buğaw buwnağan, Abat alsaq, baş uruna çatlağa Känt ete dep ayıp etme yaramas Kanadağı gün tiymeygen yurtlağa. Kanadabız, gün tigilmey töbeden, Urğan bulan sawut da ötmey gübeden. Sermegende buraq qolğa tüşmese, Selpinip kimler çıqğan yebeden? Yebeler yengen bizin uzaqğa, Yığıla turup gelip tüşdük tuzaqğa. Enni busa aytmasınlar sawdur dep. Atabay bulan birçe Qazaqğa.
Didarlar – gözler, bet, sıpat, yüz.
Tiz – tobuq, tobuq urçuğu (koleno).
Çars günler – buzuq çaqlı günler (nepogoda, newzgoda).
Xasa günler – ariw, şat, nasipli günler.
Artıladı nür bulan – nür şawlasın yaya edi (nür - bojestwennoye siyaniye).
İçler tolğan çer bulan – dert, talçıq bulan.
Tüyün – munda: dert, talaw degen maʼnada.
Çort bolğan – bek, qattı tüyülgen (krepkiy uzel).
Şınjırlı buğaw bilekde – qol buğawlar (naruçniki).
Şınjırın şek-şegine mataylar – buwun-buwunun çırmap-çırmap baylaylar (şeklik geltiregenlege, inamsızlağa demek bolma da yaray).
Şılbır – yal qıldan, çaçdan etilgen, eşilgen arqanlı şınjır.
Günleri güyez (gümez) – çars, tuñ, kök yabulğanday günler. (Güyüwlü, qayğılı günleri – A-K. Abd.).
Yol boray bitgen – qarlı, boranlı yol.
Yolları zaqum – aqubalı, ağulu, uwlu yollar.
Günleri gümüş çortlağa – günleri ariw yamanlağa.
Sant aylar – uzaqdan, asta, inciwlü, yalqıwlu getegen aylar.
Buraq at – uçağan at – Pegas.
İlbis – cin (bes).
Çat – but ara (pax).
Kana – gün tiymeygen yer, taw bet.
Gübe – temir gölek (kolçuga, pansir, latı).
Sermengende buraq qolğa tüşmese – uzatılğanda, xarmanğanda qanatlı, çalt, yügürük at qolğa gelmese.
Selpinip çıqmaq – tebinip, qaqlığıp, çalt çıqmaq.
Yebe – 1. yebe – at. 2. yebe – oq (strela). 3. yebe – qazıq, qazıqlı baru (ostrog).
Yebeler yengen bizin uzaqğa – qazıq barulu tusnaq (ostrog demek). (İ. Kerim «yebe» söznü bir maʼnasın - bırın türk tilde qazıq demek dep bere).
Tuzaq – qapqun, munda tusnaq degen maʼnada.