«Dünyalar başğa aylansa süyebiz».
Ayt çı, Qazaq, eşitgeniñ, görgeniñ? Eşitgenim aytsam, biyim, yalğandır. Görgenlerim sağa, biyim, men aytsam. Gerzeli degen, gerti, biyim, el de bar. Gerzelige gündüz girmes er de bar. Gerzelide neçe öktem er de bar. Gerzeli degen şo elde Yabuşğanlı tala degen yer de bar. Şo talada buğawlanğan atlar bar, Şo atlanı saqlap yatğan nart da bar. Geçe barıp buğawların üzdürüp, Şo atlanı alıp getgen erler bar. Anası ölgür, şo erlege malsız dep, Şu dünyada qız bermeygen yer de bar. Qıyın gelsin qısğa ayaqlı qızlağa, Malı bar dep bir qızbaynı süyegen, Bayğa barıp, daray-duray giyegen, Erenleni barın birdey göregen. Şu işlege, meni biyim, yanabız da, güyebiz, Dünyalar başğa aylansa süyebiz: - Tot basğan sawutlanı sıypama, Asırağan xınjallanı qınama, Yaxşı erkekni yawğa salıp sınama. Yağalaşıp yawlar gelgen günlerde Qazaq erdey şo qızbaylar çıdarmı? Qazaq, Qazaq degende, biyim, Yawlardan bet qaçırğan tügülbüz, Anañ ölgür, oğlu Tatar Qazaqbız! Taş çartlatğan yeldey bolup yeligip, Yarlılıqdan minip çıqğan arıqnı Şol baylanı karasına matarbız. Ol baylanı gögan gözlü ariwün, Allah berse, geng quçaqlap yatarbız.
Biyim, biy – bek, yesim, xojayınım (udelnıy knäz).
Gerzeli – hali Mıçığış Cumhuryatda Dağıstannı dazusunu qırıyındağı yurt, aldın Qumuq yaqğa, wa soñra Xasawyurt okrugğa gire bolğan.
Yabuşğan tala – yabuşğan bölek aradağı otlu maydan (poläna).
Buğawlanğan atlar – temir kişenli atlar (loşadi w celeznıx putax).
Nart da bar – güçlü, quwatlı, zor qarqaralı atlar saqlawçu, qarawulçu er de bar.
Şo atlanı alıp getgen erler bar – haydap getme bajarağan erler bar (aldın zamanlarda atlar haydamaq, urlamaq maqtawluqğa, erkeklikge sanala bolğan).
Qısğa ayaqlar – qızlar, tiştaypalar, qatınlar, qısğaayaqlılar degen maʼnada.
Qızbay – kukay, küküş, taküş, osal (slabak, trus, maloduşnıy).
Daray-duray opuraq – tafta qumaçlı bahalı yırtıllawuq opuraq.
Yanabız, güyebiz – munda bek qıynalabız, talçığabız, uşatmaybız degen maʼnada.
Asırağan xınjallanı qınama – ayawlap saqlağan xınjallanı çarlama, itti etme.
Yaw, yawğa – munda dawğa, uruşğa, yabuşuwğa, çabuşuwğa demek.
Yağalaşıp yawlar gelgen günlerde – yurtğa, elge duşmanlar çapğın etgen günlerde.
«Yawlardan bet qaçırğan tügülbüz» – daw maydandan bet burğan, qorqğanlardan, kukaylardan, osallardan, qaçğanlardan tügülbüz.
Oğlu Tatar Qazaqbız — köbüsü yerlerde yañılış küyde «oñlu» dep berilgen, Tatar atlı adamnı ulanıbız, Qazaqbız demek.
Karas – abzarda at baylaw qazıq (stolb-konowäz wo dwore).
Madarbız – at baylarbız, köbüsü yerlerde yañılış küyde «matarbız» dep berilgen.
Gögan gözlü ariwün – qara, qap-qara gözlü ariwüm (törnowo-çörnımi glazami krasawisu).