«Yaxsaylanı yaynap çıqğan bulağı».
Yaxsaylanı yaynap çıqğan bulağı, Yarlılanı yarıq bergen çırağı, Açıqğanlanı ünem azığı, Suwsağanlanı suwuq bulağı, Dertlengen yürekleni tarqanı. Dewletlileni pırqanı. Dewürler sürdüñ dostuñ tabarday, Duşmanlarıñ bolsa, qarap yanarday, Qıynalıp ör alsam mal cıydıñ, Qarawaşlar yımışatdıñ, qul tikdiñ, Qul-qazağıñ sen aldıñda yürütdüñ, Otawlarıñ maldan tolturduñ. Umar özüñ özden ulan bolsañ da, Xan ulluday tax da yasatıp olturduñ. Art abzarı at gözenli aranlım, Qaraça biyler yimik qarınlım, Abzarı aq balqıma saraylım, Adamları altın-gümüş çiraylım. Altınlı sadaq bulan bel buwğan. Atalardan haqılğa mol er tuwğan. Haqılları mollayım tawday tolqunlum, Tolqunlu deñizlerdey haqıllım. Haqılları bulan gengleşip, Generallar bulan teñleşip, Aytar işni aslam tutduñ molundan. Aytmas işni yürümediñ yolundan İtelgi quşday iptenip, Aytarıña gelgende, Oñuñ qoyup, aylanmadıñ soluñdan. Cıyıp-terip bir tutğanıñ bek tutduñ, Çımçırılıp çıqmas yimik qoluñdan Kökleni taymas Temirqazığı, Külpetsizleni üyken azığı. Köp qurdaşıñ gün sorğusuz geç gelse, Yaşnaylar yuwuq dos gelse, Aşawuna asil quşlar soydurduñ, İçiwüne çayday şarap bal berdiñ. İçkiler içgen yimik es yutup, Esirgendey axıratın unutup, Abdırağan adamlağa yol berdiñ. Abdıramas, Abdulla iniñ, adamas. Abursuz abdallağa qaramas, Asil özden er özü – Osallıqğa çıdamas. Harisine haqdan türlü iş gelse, Çirelip bir çetge başın tayamas, Namusuna nürdey canın ayamas. Qapultundan köp yamanlar uruşsa, Qarşı aldında yoldaşları qırılsa, Qarday boyun qalınlağa urmağan, Ölürmen dep qorqup qolğa barmağan, Men dep aytıp sawutların bermegen, Er abdırap şol xorluqnu görmegen. Ol ellerde yurt qıdırıp, el gezep, Erenler er tabulmas çer gelse, Dawçulağa tıñlap gesgen töresin. Törde olturup, duwan üyde sud qurup, Sorawçulağa göre söz söylep, Suda olturğan ağalanı birisi, Abdul-Umar apendini inisi, Ağa-ini birisine – birisi. Tengiriden sawluq tilep yaşağan, Teñ olturup bir tepsiden aşağan, Umar atlı miñ almağan apendi, Alıp özün Araseyge taşlağan. Araseyde Maskew paça özünde Tüz yürekden qulluq etme başlağan. Paçalağa barıp qulluq etgensen, Peterburgda apendilik etgensen. Tengiriñe qol göterip, yalbarıp, Tilegen muradıña yetgensen. Qayğılarıñ bir-bir etip er etse, Er muñayıp, ah-way bulan sır da etse, Yelkendey söznü asılın bergensen. Aşnalar bulan yuwuq sırdaşnı Anadaşday aziz görgensen. Anadaşlar bulan qurdaşnı Awurluğun haq boynuña alğansan. Teñlilerden meni başım awrutmay, Tör sürmege dos-duşmanım yer etmey, Toqtaman dep, arığansan, talğansan. Oxuğanıñ kitap Quran, käläm dep, Sen barsan menden tuwğan ulan dep, Qaytıp gelip yeriñ tapma süygende, Muhammatnı öz ornuña salğansan. Xan ulluday tax törüne tayanıp, Beş waqtide namazıñnı qılğansan. Qayğırğanlar sizge qarap muñayıp, Süyüngenler şatlanırday bolğansan.
Ünem azığı – daimlik, har zamanlıq rızqısı, aşı-suwu.
Dertlengen yürekleni //tarqanı – yürekdegi dertleni tayawu, basıltağan kömekçisi.
Dewletlileni //pırqanı – barlılardan, baylardan bir sponsor, mesenat.
Dewürler sürdüñ – uzaq ariw yaşadıñ.
Duşmanlarıñ qarap yanarday – güllerdey, açuwlanarday.
Aslam mal – köp mal, baylıq, dolluq.
Qul tikdiñ – qullar cıydıñ, birikdirdiñ.
Otawların – üylerin, ojaqların (komnatı).
Özden ulan – azat, öz ixtiyarlı erkin ulan.
Xan ulluday – ullu xanday.
Tax yasatıp – tax (tron) qurup olturduñ.
Art abzarı – at gözenli aranlım – art abzarda köp atlı aranlı.
Qaraça biyler – qaraça biyler (kötür, yarlı bolğan ekinçi darajalı biyler).
Abzarı aq balqıma saraylım – abzarda aqlığından balqıyğan qalalım.
Adamları altın-gümüş çıraylı – ariw açıq, iliyaqlı yüzlü, boylu, soylu.
Altınlı sadaq bulan bel buwğan – belinde altınlı sadaq bulan (na poyase s zolotom şitım kolçanom).
Haqılğa mol – haqılğa bay.
Mollayın tawday – mol, zor ullu, uzun, örlü-xırlı tawday (kak ogromnaya gora).
Geñeşip – birçe oylaşıp iş görüp.
Aytmas işni – aytılmas, maqtalmas, yaman işni.
Teñleşip – teñ bolup.
Aslam – ullu, mol, köp.
İtelgi quşday itenip – taw qarçığaday hitinip, talpınıp.
Oylamadıñ soluñdan – yañılış, ters oylamadıñ.
Çımçırılıp çıqmas uçun qoluñdan – qutğarılıp, sıpqırılıp çıqmas uçun.
Temirqazıq – Yerni, Köknü terbenmes orta qazığı degen maʼnada (os Zemli i Neba).
Külpetsizleni üyken azığı – ojaqsızlanı, amalsızlanı ullu, köp, erkin aş-suwu.
Sorğusuz gelse – sorawsuz, gözlewsüz, xaparsız, çaqırıwsuz gelse.
Şarap bal – şerbet ballı içgi (medowuxa, nıta).
Es yutğan – esin tas etgen.
Axıratın unutup – ölejegin unutup.
Abdırağan adamlağa – adağan, adaşğan, büdüregen adamlağa.
Haqdan türlü iş gelse – Allah buyurup iş gelse.
Çirelip bir çetge başın tayamas – orayıp, canın ayap, başın yaşırmas.
Qapultundan – xaparsızdan, qarawullanmağan, gözlenmegen, yaşırtğından.
Abdırap – adap, büdürep, tartınıp, boşap, osal bolup.
Töre gesmek – ayıplamaq, taqsırlamaq, qanunlu sud etmek.
Duwan üy – duwan yürülegen üy, duwanxana, mahkama.
Ağa – munda bay-biy, bek (aga, gospodin).
Tengiri – Allah.
Miñ almağan efendi – damğasız, ayıpsız efendi.
Aresey – Rossiya.
Tüz yürekden – halal, haq yürekden.
Muñayıp – buyuğup, talçığıp, paşmanlıqğa tüşüp.
Aşnalar – dos-qardaş, yuwuq qardaş.
Tör sürmege – örlük almağa, ör iş kütmege.
Tax törüne tayanıp – opirayas na sarskiy tron.