«Abdulmuslim xan şawxal».
Sadağıñda sansız yebelim, Berçini bek gübelim, Miñleri miñsiz çiraylım, Mingen atı qaqma yürüşlüm, Miñleni titretgen tawuşlum, Miñ maqtawğa tiyişlim, Beş barmaqlı qolunda Miñler sıyğan uwuçlum; Bilegen biçaq yimik, Biy sen ediñ taştülek, Bir qabında yanaşa Egiz eki quş yürek. Quş yüregiñ kür edi. Qonuşuñ xan Şura edi. Ülkeñ ullu Dağıstan Sağa ölmesin der edi. Başıñ teñli biylerden Har bir işiñ ör edi. Tax töşekli, tam üylü, Tawuşuñ dewperi edi. Turuşuñ yer turada, Dağıstan xan Şurada, Senden güçlü xan da yoq Tergep baqsaq burada. Güçlü ediñ kömegiñden Koçaplar bet urmasday, Qayırlanğan qara nart Qarşı aldıñda turmasday. Qarşı gelgen yawlardan Qorqup betiñ burmasday. Kar qılmas edi köpler Dağıstannı xanına. Yaratğannı buyruğu Bir gün yetdi yanına, Buyruqlu Azireyil Qırsaydı onu canına. Aslam üyü zar boldu Asil Dağıstanına. Dağıstanğa zor boldu, Taw da, tüz de tar boldu. Azmuş, azğan sarige Asil quşlar xor boldu. Xor quşlar quzğun atlı Qarçığanı quwğan gün, Qanatsız qarçığağa Qara qarğa tuwğan gün, Qarğalardan tartınıp Qara laçin çuwğan gün. Qara xalqıñ qayğırdı Xan sen özüñ uwğan gün. Xan uwğan, xalqı yanğan, Dos dertli, duşman qanğan, Dağıstanday elleni Bağanası çort sınğan. Çort sınğan bağanası, Yalğanmasday ep bolup. Doslarıñ tüyünmekde Duşmanlarıñ köp bolup. Duşman belin sındırmay, Canğa capa çekdirmey, Çatırıñ çetge tikdirmey. Çetge tikmey çatırıñ, Cıyalmay köp batırıñ. Batırlarıñ cıyalmay, Qarşı aldıñda boyalmay, Qarşı gelgen yawlağa. Tuwra çabıp sep almay. Tolpanday qara xalqıñ Qızıl qanğa boyalmay, Tawlar tawğa qağılmay, Taw asgerler dağılmay. Bir gözlü eki tübek Bir-birine çağılmay. Sılıw sanıñ sel çapmay, Singiriñ bolat qırqmay; Toq sawruñnu top buzup, Aç beliñden oq çıqmay. Ajdahaday awazıñ Axırğaday gezetmey, Ülkeñ Dağıstanıña Ülgü – töre görsetmey. Abumuslim xan şawxal, Sen igitge parzmedi Üyde yatıp ölmege, Qatın-qıznı bozartıp Yaşırtğın can bermege.
Sadağıñda sansız yebelim – qap, qutuq yançığıñda sanawsuz köp oqlum (nesmetnım çislom strel w kolçane).
Yebe – qanatlı oq.
Berçini bek gübelim – gübe çüyü (w kolçuge krepkimi zaklöpkami). Miñleri miñsiz çırayım – miñlersiz, bahanasız, damğasız ariw, taza yüzlüm.
Qaqma yürüşlü – qır tawuqday öktem yürüşlü.
Miñleni titiretgen tawuşlum – köpleni silkindirgen, qorqutğan awazlım.
Taştülek biy ediñ – qarçığaday, taş yimik qattı biy ediñ.
Bir qapda egiz eki quş yürek – bir qapda, bir kökürekde eki birdey qayratlı güçlü yürek sıyışğan demek.
Dewperi – dewdey kelpetli, yüzlü, zor, ullu qarqaralı.
Qonuşuñ xan Şura edi – turuşuñ, yaşaw yeriñ Şura (markaz, tax şahar) edi.
Başıñ teñli biylerden har-bir işiñ ör edi – sağa teñ, sendey biylerden işleriñ ör, artıq edi.
Tawuşuñ dewperi edi – tawuşuñ, sesiñ, sözüñ güçlü edi.
Burada – bu arada, munda, bu yaqda.
Koçaplar bet burmasday – koçaplar da yıqmasday (daje borsı-atletı ne odoleüt).
Qayırlanğan qara nart – qaharlanğan, tiri, güçlü-quwatlı qoççaq nart.
Yawlar – dawlar, çabuşuwlar (seça, srajeniye).
Kar qılmas – kar etmes, biraz da güç, taʼsir etmes.
Qırsaydı canına – qanıqdı, canın alma urundu.
Aslam üyü zar boldu – saray, qala üyü talçıqğa tüşdü.
Azmuş, azğan sarige asil quşlar xor boldu – asil canlar awruwğa tarıdı, abursuz, sari orusğa xor boldu.
Asil quşlar xor boldu – asil, ariw yaş qızlar xorlandı.
Quzğun atlı – yaman, qarğışlı atlı.
Qarçığa quş – sokol.
Laçin – qarçığa taypa qayır quş (kreçet).
Laçin çuwğan gün – kökge, örge uçurğan gün.
Qara xalq – sabançı xalq, sayaw xalq, raiyat (podannıye şauxala).
Uwğan gün – ölgen gün.
Xalqı yanğan – xalqı bek talçıqğan.
Dost dertli – talçıqlı, qayğılı; duşman qanğan – süyüngen.
Bağanası çort sınğan – tayaw bağanası eki sınğan (stolp-opora razlomalas).
Canğa capa çekdirmey – canın qıynamay, azaplamay.
Sep salmaq – qamamaq, qurşamaq (okrujit, osadit).
Çatırıñ çetge tikdirmey – çatırıñ (çertog, şatör) çet yerde qurmay, yaşırmay.
Batırlarıñ cıyılmay, qarşı aldıñda boyalmay – aldıñda qanğa boyalmay, qan tökmey.
Qarşı gelgen yawlağa, tuwra çabıp sep salmay – qarşı duşmanlağa betge-bet yabuşmay, olanı qurşamay, yeñmey.
Tolpanday qara xalqıñ – ajayıp köp xalqıñ, raiyatıñ (poddannıye).
Sılıw sanıñ – tımırsıq, tolu sanıñ.
Sel çapmay – munda: terbenmey, sürlükmey degen maʼnada.
Siñir – cila, suxojiliye.
Toq sawru – toq, tolğan, tımırsıq, //sılıw yanbaş.
Ajdahaday awazıñ – güçlü, zek awazıñ; ajdaha – köp başlı yılan (drakon, gidra).
Gezetmey – munda: awazıñ yayılmay, eşitilmey demek.
Ülgü töre – özgelege ariw, yaxşı ülgülü, ibratlı bolmay.
Parzmedi – gerekmi edi, borçmu edi, tiyişlimi edi.
Qatın-qıznı bozartıp – qatın-qıznı qaratıp, talçıqdırıp, olanı aldında üyde ölmege.