«İyelmesin, seni butaqlarıñ sınmasın».
Yemişisen gül terekli bawlanı, Süt imkänlı süygenisen sawlanı. Seni, biyim, süymegenler suw bolsun, Otawların qarañı alsın, çuw bolsun. Biyim, seni süymegenler - bar bolmas, Sen dep sağa qarağanlar - xor bolmas. Sen-sen - degen zamanda, Men-men - degenleni işi ör bolmas. Sawluğuñdan süyüngenler yer bolmas, Sınalğan sen safa altınlı tereksen, Salqınıñ sap gişige tar bolmas. Salqınlığıñ saray üy yimik, Sawluğuñ hali men aytağan küy yimik. İyelmesin, biyim, seni butaqlarıñ sınmasın, Dos-qardaşıñ qayğı bulan yanmasın, Bitimi miñsiz tatar er. Betleşgende miñe güçü çatar er. Görülüşgen köp xalqğa Göndelen toğas bolduñ, yaw bolsa, Aşarbız da, içerbiz Sendey bizin can biyibiz saw bolsa.
Imkänlı – munda: gerek çaqı, köp süye edi demek.
Otaw – üy (komnata).
Çuw bolsun – şıp bolsun, birew de qalmasın.
Xor bolmas – esgik bolmas, sögülmes, abursuz, sıysız bolmas.
Safa altınlı terek – süyünçlü terek (derewo radosti, udowolstwiya).
Sap (san) gişige – köp gişige.
Yanmasın – güymesin, talçıqmasın, qayğırmasın.
Miñsiz tatar er – bahanasız, damğasız, kemçiliksiz er.
Güçü çatar – güçü yetişer, bajarar, küter.