Тамурлангъан терекмен
(Язывчуну моллагъа берген жаваплары)
Язывчу:
Къарт къойнумда къалач бар, бир де тоймасман, бир де. Сёзюм гьакъ, ишим герти: даим болурман оьрде.
Сен буса шам ел йимик, ондан-мунда гьавасан, Не якъда пайданг буса, шолай багъып авасан.
Молла:
Ялгъанчы кёп гьюнерли, халкъны алдатып яшай, Ёгъун да бар гёрсетип, гьисапда болуп яшай.
Сендей начар гертиге нагагь тартыгъып гете… Шунча да аз матагьгъа юрегин салып нете?
Язывчу:
Ал бетде асыл матагь гьар заман да аз болур, Янгыз болса да ол гюн ону гючю юз болур,
Сен сюесен гюн батып, даим гече болгъанны, Гертиликни тас этип, юрютмеге ялгъанны.
Молла:
Заманны фурсат табып, хыйлы къуват къазандым, Иерченим кёп этме тюрлю-тюрлю безендим.
Сен буса ач бёрюдей, турасан гьар гюн азып, Оьлмегим къаравуллап, магъа къабурунг къазып.
Язывчу:
Тамурлангъан терекмен – гьар кимге аркъа таяв, Салкъынында ял ала, сюйсе атлы, сюйсе яяв.
Сен буса тамурсузсан – къатты уьфюрсем йыгъарман, Магъа къазгъан къабургъа элтип сени тыгъарман.
Молла:
Сен айтгъандан сыныгъып, уялсам да халкъ билмей, Мен бажаргъан уллу ишлер сени къолунгдан гелмей.
Къуватынгдан не пайда, юрюмей бир де ишинг, Гётек гетген яшавунг, тёгюлген бары тишинг.
Язывчу:
Гьар сёзюмде маъна бар, гертидир мени атым, Исбайы арив ишим, айыпсыздыр бар затым.
Ялгъанчысан, сёзюнгню уллу антдан башлайсан, Бир кепек пайданг буса, досгъа да бет ташлайсан.
Молла:
Ялгъанчыман, дюньяны гьар-бир ишин англадым, Пайдасы ёкъ гертиден ялгъанчылыкъ тангладым.
Гертимен деп хохайып, танымайсан заманны, Кёп гезеп, зат да тюшмей, басасан вай аманны.
Язывчу:
Герти, мен ачдан оьлюп къалсам да ялгъан айтман, Бу дюньяны малы учун, герти сёзюмден къайтман.
Гьар сагьатда тюрленип, турасан ялгъан айтып, Гюнде нече гишиге сёз берип, сёзден къайтып.
Молла:
Ал бетде гьар гюн сайын, нече тюрлю боламан, Ялгъан булан болса да, халкъны гёнгюн аламан.
Сен буса гертимен деп, нече сырдан озасан, Тувра айтып, муъминлени юреклерин бузасан.
Язывчу:
Айтгъандокъ терс гёрсе де, дурус сёз пайда берир, Гьакъ сёзюм залим болуп, артда да яхшы гёрюр.
Бугюн гёнгюн алсанг да, тангала юзюнг ачар, Ялгъанчы намартсан деп бары халкъ сенден къачар.