Рушдия^✻ къысмы

Маргьум бир муаллимден алажакъ къадарны охуп битген сонг, экинчи къалгъан ягъын охумагъа бир мунасип^✻ устаз излей башлады. Ол замангъы муаллимлик этеген адамлар кёбюсю авул моллалар бола эди. Белгили давамлыкъ этеген мадраса-мактап болмагъан сонг, ол моллаланы бирисине тилеп, дарс охужакъ болгъан сонг, гьужурасында^✻ олтуруп охумагъа башлады. Озокъда, муаллими авул молла болгъан сонг, авулда бир адам оьлсе яда той болса, бир нече гюн охулмай да къала эди. Мундан башгъа, иш вакътыларда^✻ бичен жыймагъа, гьабиждей-будай ташымагъа да элте эдилер. Белгили гьакъы болмагъан сонг, хыйлы гюнлерде дарс болмай да къалады.

Бу маргьум шол ёрукъда – бир молладан башгъасына, бир юртдан башгъа юртгъа бара туруп, Хасавюрт оькрюкден^✻ чыкъмай бир нече йылланы ичинде арапчадан ва тюркчеден етер къадар малака^✻ гьасил этди^✻. Гьар не китапгъа къараса мурадын англайгъан даражагъа етди.

Маргьум Нугьай, оьзюндеги закилик ва пагьмусуна таянып, мутааллим^✻ заманындагъы хыяли^✻ вакътыларын мугьмал^✻ йибермей къастында давамлыкъ этип чалышгъан болса эди, шексиз Дагъыстанда машгьур бир сияси^✻ алим болажакъ эди.