Кагъыз язмакъны эдеплери

Кагъыз язагъанда, яхшы, сав кагъызгъа языгъыз. Бир китапны яда дефтерни^✻ къырыйындан йыртып алгъан кагъыз гесекге язмагъыз. Кагъызны ачыкъ, охуп билир йимик хат булан языгъыз. Тарыкъсыз сапсаталар^✻ булан кагъызны толтурмагъыз. Ка[гъызны] языву сонгундан тюзетилген^✻ яда бичакъ булан къырылгъан ерлери болмасын.

Кагъызыгъыз ачыкъ оьз тилигизде болуп, тарыкъсыз мукъаддималар^✻, арапча, орусча сёзлер къатышдырмагъыз.

Гьеч гишиден гелген кагъызгъа жавап язмай къоймагъыз. Кагъызны башына яда артына – йылны тархын, гюнню санавун, шагьарны атын, артына да оьзюгюзню атыгъызны язмагъа унутмагъыз. Къылыгъы, иши билинмеген бир адамны макътап кагъыз язмагъыз; ким биле, уялмагъа тюшер.

Язгъан кагъызларыгъызны копиясын алып къалыгъыз, гелген кагъызланы оьзлени жыйып сакълагъыз. Кагъыз язагъанда, башына язмагъа гьар кимни оьзюне ярашывлу макътавлар бар, шоланы уьйренип, еринде къолланмагъа^✻ къаст этигиз. Гьар кимге де – «Азиз ул-вуджуд ва касир ус-суджуд»^✻ деп язмагъа багъыйлы гелмей.

Акъча къызгъанып, канвертни^✻ бек учузун алмагъыз, аны уьстюнден къарап кагъызны охуп, сырыгъызны билирлер. Канвертни ябушдурагъанда, къырыйларын тилигиз булан тюкюрюклемегиз, андан тюрлю аврув[лар юкъмагъа] ярай.