Батырмурзаевланы тухуму

Яхсайлы оьзден Абсаламны эки уланы болгъан: Нугьай ва Абдулвагьап. Нугьайны Зайнулабид, Абдулгьамит деп эки уланы ва Рафиш деп бир къызы болгъаны да белгили. Зайнулабидни къысматы гьакъда кёп айтылгъан ва язылгъан. Ол, пагьмулу ва къоркъув не экенни билмейген 22 йыллыкъ жагьил улан, халкъын насипли ва эркин этемен деген ой булан ябушуп, оьлюп гетген. Оьзю оьлгенден берли 100 йылгъа ювукъ бола буса да, ону аты гьали де халкъыны эсинден таймай ва янгы наслулагъа уьлгю болуп тура. Зайнулабидни къабуру Адильянгыюртда.

Зайнулабидни иниси Абдулгьамит де охуп, атасыны ва агъасыны ёлунда чалышып, алим бола. Къумукъ тилни грамматикасын, охув китаплар яза. Пачалыкъ ишлерде де уьстюнлюклеге етишип, Дагъыстанны Оьр Советини Президиумуну юрютювчюсю болуп ишлей. Ол, 60 йылына да етмейли, хапарсыздан чакъсыз оьле. Абдулгьамитни де Зайнулабид, Зиявдин деп эки уланы ва шолай да эки къызы болгъан. Зайнулабид орус къатын алып, бир нече йыллар Анжикъалада яшагъан сонг, Беларусгъа гёчюп, гьали онда яшай. Зиявдин де орус къатын алып, Молдовада яшагъан ва шонда оьлген. Оланы авлетлери булан да къардашларыны байлавлугъу ёкъ.

Рафишни гьакъында ол Къазма юртгъа эрге баргъанындан къайры бизде дагъы маълумат ёкъ. Кюйге къарагъанда, ол да узакъ яшамагъан.

Нугьайны иниси Абдулвагьапны Низамдин, Паччаханум, Салимаханум деген авлетлери болгъан. Насипге, оланы авлетлери ва авлетлерини авлетлери де бизин арабызда яшап тура. Дагъыстанны халкъ шаири Мугьаммат Атабаев – Паччаханумну уланы. Белгили алим, геология-минералогия илмуланы доктору Анвар Батырмурзаев мисгин де – Салимаханумну уланы. Анвар гечинген гюн ону уланы Уллубийге улан тувуп, огъар да Нугьайны атын къоялар.

Низамдинни уланы Умарпаша Батырмурзаев гьали-гьалилерде тухумуна ва къардаш-къурдашына багъышлап «Оьктеммен сизин булан» деген китабын чыгъарды. Дагъы да Умарпаша инилери булан Адильянгыюртдагъы Зайнулабидни ташлангъан, бузулгъан эсделигин янгыртып, макътавлу тухумуну атын дагъы да оьр этди.