Минглибай эфендиге жавап

Ва алайкюм ассалам, ай Минглибай, Дуам сизге – узакъ оьмюр берсин худай. Гьар ишигиз таркъалмайлы толу болсун, Саф да болсун таш булакъдан акъгъан сувдай.

Саламдан сонг сагъа сёзюм шудур – факъат «Эдил» берген макъаламны гёрмюшсен ят. «Эсги чырны минги» деюп янгылыш англап, Басдырмышсан магъа «шуруда» ачыкъ хат.

Гелишмейдир бугъа булан бичен чалыв, Терен сёзден, асилин билмей, айып табыв. Гьар охугъан язывчунгну англамасдай, Гьакъыкъатын биле алмай, ёлдан тайыв.

«Эдилни» сен къолгъа алгъансан, гёнгюл салмай, Хабарына къарагъансан бирин къоймай, Сайки, мени макъалама шиъру деюп. Айыплайсан, ич маънасын билме болмай.

Къазакъ тилде язгъансан деп маташгъансан, Макъалам аслусун билмей сатышгъансан. Ол макъалам шиъру экенни къайдан билдинг? Эсги татар черлерин де неден гёрдюнг? Оьзюнг татар боласан, тек татар тилин Къазапланып, англамайлы, сыртгъа алдынг, Мени буса къазакъча деп язгъаным ёкъ. Къазакъча булан сартчагъа гьюнерим жокъ.

Миллетиме пайдалымы-пайдасызмы – Онда ону, билме сюйсенг, арабы да. Билмегенни инкар этив – эрлик тюгюл, Муна ону дурус чыкъгъан зарбабы да.

Шол себепли, билмегенни гиши сюймес, Макъаламны сен янгыдан охуп къара, Мазмусуна тюшюнерсен бара-бара. Эсги сырланы язывда мурадым шол:

Тилибизни генг этивге излеп чара. Сарт къазакъдан башгъаны сен билмегенге Тюрлю халкъ арасында юрюмегенге Ят сёзлени байлар йимик гери урасан,

Тюрклени тюрлю къавумларын гёрмегенге. Минглибай достум! Тувгъан еринг Зиясан буса, Яхсайлыны асарын тап къайдан болсанг. Эсги татар шаирлени ондан охуп,

Кавказгъа сен сапарынг къыл – къачан болсанг. Ондан барсанг, табарсан сен къумукъланы, Олай нече къараногъай – жумукъланы Адатларын, юрюшлерин, гийимлерин,

Сен гёрмеген яшавларын-сыныкъларын. Деймишлер: хайырлы сёз боладыр аз, Къайтып гелмей къалмас элинг берген аваз. Ай къардашым! Ачувланмайман танкъытгъа, Кепинг гелсе, ондан дагъы бетерин яз.