Tamurlanğan terekmen
(Yazıwçunu mollağa bergen cawapları)
Yazıwçu:
Qart qoynumda qalaç bar, bir de toymasman, bir de. Sözüm haq, işim gerti: daim bolurman örde.
Sen busa şam yel yimik, ondan-munda hawasan, Ne yaqda paydañ busa, şolay bağıp awasan.
Molla:
Yalğançı köp hünerli, xalqnı aldatıp yaşay, Yoğun da bar görsetip, hisapda bolup yaşay.
Sendey naçar gertige nagäh tartığıp gete… Şunça da az matahğa yüregin salıp nete?
Yazıwçu:
Al betde asıl matah har zaman da az bolur, Yañız bolsa da ol gün onu güçü yüz bolur,
Sen süyesen gün batıp, daim geçe bolğannı, Gertilikni tas etip, yürütmege yalğannı.
Molla:
Zamannı fursat tabıp, xıylı quwat qazandım, İyerçenim köp etme türlü-türlü bezendim.
Sen busa aç börüdey, turasan har gün azıp, Ölmegim qarawullap, mağa qaburuñ qazıp.
Yazıwçu:
Tamurlanğan terekmen – har kimge arqa tayaw, Salqınında yal ala, süyse atlı, süyse yayaw.
Sen busa tamursuzsan – qattı üfürsem yığarman, Mağa qazğan qaburğa eltip seni tığarman.
Molla:
Sen aytğandan sınığıp, uyalsam da xalq bilmey, Men bajarğan ullu işler seni qoluñdan gelmey.
Quwatıñdan ne payda, yürümey bir de işiñ, Götek getgen yaşawuñ, tögülgen barı tişiñ.
Yazıwçu:
Har sözümde maʼna bar, gertidir meni atım, İsbayı ariw işim, ayıpsızdır bar zatım.
Yalğançısan, sözüñnü ullu antdan başlaysan, Bir kepek paydañ busa, dosğa da bet taşlaysan.
Molla:
Yalğançıman, dünyanı har-bir işin añladım, Paydası yoq gertiden yalğançılıq tañladım.
Gertimen dep xoxayıp, tanımaysan zamannı, Köp gezep, zat da tüşmey, basasan way amannı.
Yazıwçu:
Gerti, men açdan ölüp qalsam da yalğan aytman, Bu dünyanı malı uçun, gerti sözümden qaytman.
Har sahatda türlenip, turasan yalğan aytıp, Günde neçe gişige söz berip, sözden qaytıp.
Molla:
Al betde har gün sayın, neçe türlü bolaman, Yalğan bulan bolsa da, xalqnı göñün alaman.
Sen busa gertimen dep, neçe sırdan ozasan, Tuwra aytıp, muʼminleni yüreklerin buzasan.
Yazıwçu:
Aytğandoq ters görse de, durus söz payda berir, Haq sözüm zalim bolup, artda da yaxşı görür.
Bugün göñün alsañ da, tañala yüzüñ açar, Yalğançı namartsan dep barı xalq senden qaçar.