⁂

«Батырмурзаевны анасы шундамы?»

Болшевиклер Яхсайгъа гиргендокъ шолай сорагъан. Олардан беш вакил мени уьстюме гелип, магъа къайгъырышдылар. «Сени уланынгны къанын алажакълар бизбиз» дедилер. Оланы бирси де бусурман тюгюл эди. Оьзюню тилинден-дининден болмагъанлардан да къардашлар тапгъан алай улан бар эди сагъа ол.

Шо заман Зайнулабидни пашман сюлдюрю гёз алдыма гелип, тез тайып къалды. Буланы арасында оьзю ёкъгъа болгъан болажакъ о.

Яхсайда мен бир керен къатынлагъа сорадым:

– Уллу боранны сюермидигиз, икъгъа гирмеге сюермидигиз? – деп.

– Икъгъа гирме сюер эдик, – дедилер.

– Болса, гиригиз колхозну къапусуна – дедим. Шолай, колхозгъа жаным булан гирген гишимен. Гьали Зайнулабидни иниси шагьаргъа гелген сонг, ону яшларындан айрылып болмай мунда къалып тураман. «Баланы баласы балдан татли» деген зат бек герти зат экен, ону гертилигин сынамагъа магъа йимик, я Аллагь, сизге де насип болсун.

Болса да отбашны сагъынаман. Шо саялы бу электрик печни эки де тобугъума ювукъ этип олтургъаным да.

Гёресиз бу уьйлени. Бир бети Таргъу тавгъа бакъгъан, бир бети Анжи денгизге къарай. Амма уьчюнчю къабатда бусакъ да Таргъу тав гёрюнмей. Неге тюгюл къаршыбызда о тавдан бийик болуп этилген къалалар бар. Оларда Зайнулабидни Иван, Магьамма, Амарцу, Абрам къардашлары яшай. Амма денгиз чи гёммек – гёк болуп гёрюнюп тура дагъы. Неге тюгюл ону ягъасында узун бав бар. Онда нече тюрлю чечек бар. Олар да гюнтувгъан чечеклеге, иван мелевшелеге, даци гюллеге ошай.

Анасыз Зайнулабид, сен тириле бусанг, мен оьлмеге рази эдим.

Тек шу баламны балаларындан нечик айрылайым, шулай Зайнулабид йимик уланлар болуп битсе, сонг чу оьлсем де къайырмай эдим.