«Девюр-девюр, питне девюр заманда».

Гёзелдирик салгъан булан гёз гёрмей, Гёз ишлемей, бакъгъан булан юз бермей. Гюнлер бара кёп анадаш юз гёрмей. Анадашлар булан ювукъ сырдашгъа Гьашыкълыкъда сёз къоймамакъ эрдендир. Гьашыкълагъа «ай-амансыз» ай гелмес, Дидарлагъа тун-тумансыз гюн бермес. Дидарлар булан, вай, амансыз, гюн гетсе, Тенглисине эр саламын мунг бермес. Эр саламын мунг бермеги недендир? Анадашлар аз гёрюнеген ердендир. Анадашгъа бакъмай жан чыкъмай. Янгызлыкъда сёз къоймамакъ эрдендир. Аврумай арслан бетин агъартып, Сыр къарамай сала санын саргъалтып, Кёкюреклер тюрлю черден толгъан сонг, Зар-зигерли къайгъы къопмакъ бирдендир. Кёкюреги хаса кюллюлер Къызбайлдагъа дерт тутмагъан тюллюлер. Шаваларда сейир этмек кюрдендир, Шавла берген шам чырагъы нюрдендир. Шавласы ёкъ гюнлер бара тунукъгъа, Шай, къара гюн, дёндюк хаса-мамукъгъа. Яратгъаным сюйсе бизин къайтарыр Оьзденлери къулгъа дёнген Къумукъгъа. Оьзденлери къара къулгъа ошагъан, Оьзенгилер басгъан аякъ бошагъан, Оьзенгиге къайтгъан аякълым, Аргъумагъы айтабанлы туякълым… Атолулар оьзденлерин ташлагъан, Къара къулгъа дёндюрмеге башлагъан. Шавла берген шам чырагъы сёнген сонг, Шат юрекден шатлыкъ гетмей нетежек, Ярны йимик бойнубузгъа минген сонг, Минген буса бойнубузда яр йимик, Мисгинлени дюньясы мукъ, тар йимик, Девюр-девюр, питне девюр заманда Деврен гетген гюнжувакъда къар йимик. Къол панарын гесек девюр сюрмесе, Дос-кърдашны айда-йылда гёрмесе, Ашналагъа гьашыкъ салам бермесе, Ананайлар булан гюнюн онг гёрмес, Аваданлыкъ булан жанын сонг бермес. Азирейил жан алмагъа гелгенде, Гьёкюнчлю къул арсар болмакъ гертидир. Къазагъымны къайгъылары къопгъан сонг. Кёкюрекден кёплеп чыкъгъан дертидир.

Питне девюр – башалман, башдан-баракъ, булгъавур, пакарсыз, питнели, къавгъалы, къалмагъаллы, пасат заманда (в смутные времена).

Анадаш юз гёрмей – дос-къардашны бетин гёрмейли.

Сырдаш – сюеген, инанагъан адамы, досу, сыр чечеген адамы.

Сёз къоймамакъ – сёз айтмамакъ, сёз айтмай къоймакъ.

Дидарлар – гёзлер.

Тун-туманлы гюн – къара, тунглу туманлы, чарслы гюн.

Мунг – пашман, талчыкълы (скорбный, печальный).

Сыр къарамай – сыра къарамай, //биртде, бютюнлей къарамай, ойламай.

Тюрлю черден – мунда тюрлю дертден, къайгъыдан, аврувдан демек.

Кёкюреклер тюрлю черден толгъан сонг – тёш, кёкюрек кёп дертлерден толгъан сонг.

Зар-зигерли къайгъы къопмакъ – башына авур, дертли къайгъылар, талчыкълар тюшмек.

Кёкюреги хаса кюллюлер – кёкюреги, юреги таза кёплер, адамлар.

Тюллюлер – уявлар, уявлулар, эсин тас этмегенлер.

Шава – Бабаюрт районда Терик бойдагъы юрт, шаир шонда бир вакъти яшама да яшагъан, йыр ярышларда ортакъчылыкъ этген.

Сейир этмек – мунда: кюрлюкден гезев, йыбав этмек демек.

Шам чырагъы – уллу генг ярыкълы лампа (лампада, люстра).

Шай, къара гюн, дёндюк хаса-мамукъгъа – адаршай бизге, хаса-мамукъдай бошадыкъ, агъардыкъ, тавшалдыкъ.

Яратгъаным – Къудратлы Аллагь (Всемогущий Творец).

Оьзден – азат, оьз ихтиярлы халкъ къатлаву.

Къара къул – холоп.

Оьзенги – ерни айыныны аякъбасагъан темири (стремя седла).

Аргъумакъ – сыйлы жынслы, бек чабагъан, югюрюк ат (аргамак).

Атолу – айтылгъан, макъталгъан, белгили, абурлу адам (знать, знатный, благородный).

Мисгинлени дюньясы мукъ, тар йимик – ярлыланы, амалсызланы, пакъырланы дюньясы, яшаву авур, тарлыкъда, талчыкъда.

Девюр-девюр, питне девюр заманда – бу къавгъалы, къалмагъаллы, эришивлю заманда (смутные времена).

Деврен гетген къар йимик – мунда: кирленип, эсгиленип, ирип гетген къар йимик.

Къол панары – къысматы, талигьи деген маънада.

Девюр сюрмесе – яшав, оьмюр гёрмесе, яшамаса.

Мукъ – ёкълукъ, магьрюмлюк (мисал учун, гьакъылгъа мукъ – гьакъылы ёкълукъ).

Аваданлыкъ булан жанын сонг бермес – тегинлик булан, алгъасап, жанын сонг бермес.

Арсар болмакъ – бошамакъ, къоркъмакъ, бюдюремек, тартынмакъ.

Къайгъылары къопгъан сонг – къайгъы-дертге кёп тарып оьрчюкген сонг.

Кёкюрекден кёплеп чыкъгъан дертидир – тешип, ярып чыкъгъан талавудур.