«Къарагъайлар бою къакъ элме».

Къарагъайлар бою къакъ элме, Къамалышгъан гюнлерде, Къазагъым, Достунг къоюп сав гелме. Къаргъанакълар бою къаргъа уя Къаргъа юдап сынса да, Къакълыгъып къазархыдай иелме! Чагъылгъан мажар окъгъа май тонгса, Чирикли чынарлагъа сюелме. Къамалгъанлар гёрсенг, бий болма, Къавгъада къачгъан булан ий болма. Чилледей чырмавукъгъа чирийген Чынарлагъа ошама. Чынарланы чапса къыяр къылычгъа, Чыкъ тийген кагъызлардай бошама. Къылычлар булан генглешсенг – Къыйгъанынга боялма. Язиде сагъа сёз етсе, Айтгъанынга уялма! Ярармы къылсыз хомуз кюйлеме, Яманлагъа гёре сёйлеме? Яманлар булан язда хашынма. Язиде сагъа яв етсе, Жанынга себеп излеп яшынма. Чагъывчулар булан уьйлешме, Чали ичинде арив булан кюйлешме. Къурдаш-дос деп инанып, Къырдагъы къапгъын ишинг сёйлешме. Эммекдир, эмсиз аврув тапдырар, Гьёкюндюрюп бармакъларын хапдырар. Жанынг учун къардаш, ёлдаш шол болур: Жаялы окъдай сагъа болгъан сонг, Шамлангъанны уруп атдан салгъан сонг, Дагъы да дос-къардашынг шол болур. Тарыкълы гюн таймай таяв болгъан сонг, Ашналаны анадашдай гёргюн сен, Ашгере гёнгюн алып билген сонг, Къавгъалашгъан гюнлерде Сен дегенни ягъасындан алгъан сонг, Къаршынгда азиз жанын берген сонг.

Къарагъай терек – лиственница болма герек.

Элме терек – карагъач, вяз.

Къамалышгъан гюнлерде – къуршалгъан, къамавгъа алынгъан, тюшген гюнлерде (когда в окружении, в осаде).

Къаргъанакъ (оьсюмлюк) – арча (можжевельник).

Къаргъа юдап сынса да – кёп къаргъа ябурулуп къонуп, авурлугъундан сынса да.

Къазархы – окъжая (лук).

Мажар окъ – уьч хырлы окъ (стрела); мажар – мадьяр, венгер.

Окъгъа май тонгса – окъ къолланмайлы, огъар май сюртюлсе, сыланса, ягъылса, къатса.

Чынар терек – чинара, платан.

Генглешсенг – чабушсанг, ябушсанг (сражаться).

Къамалгъанлар гёрсенг, бий болма – къамалывда ябушагъанлар гёрсенг, бийдей осал болма.

Къавгъадан къачгъан булан ий болма – ябушув-чабушувдан, урушдан къачгъан булан къурдаш, уьюр болма, ювукълукъ тутма.

Мажар тюбек – венгер оьрнекли тюбекдир.

Ий болма – ёлдаш, къурдаш, ювукълукъ тутма, уьюр болма, таби болма.

Къыйгъанынга боялма – савут чапгъан, яралагъан, оьлтюрген душманынгны къанына батма, боялма.

Яманлар булан язда хашынма – яманлар булан иш гёрме, ювукълукъ тутма.

Язиде сагъа яв етсе – эгер де сагъа яш заманынгда яв, дав етсе, етишсе.

Чагъывчулар – питнечилер, тилчилер.

Чали – гюрен, гьайванлар учун чал (загон для скота).

Къапгъын иш – халбатлы, яшыртгъын иш.

Эммек – авур, аваралы, къыйын къуллукъ.

Шамлангъанны – сагъа ачувланып, гизирикленип тирелгенни, чапгъанны.

Ашналар – дос-ювукълар, къардашлар.

Ашгере (ашкере) – аян, ачыкъ, белгили.

Язиде – эгер, эгер де, эгердим (если) // (язиде - яш, жагьил заманынгда – А.-Къ. Абдулатип).