Дертюнчю герюнюш

Уьчюнчю гёрюнюшню декорациясы. Янгурлу гюн. Тамгъа «Ярыкъ Ел» ва «Янгы Яшав» колхозларыны авлакъларыны планлары илинген. Ортада «Ярыкъ Ел» колхозну янгы мюлклерини гьап-гьазир макети. Гьали ону ичинде ва ал бетинде лампочкалар да яна. Мююшде тумбочканы уьстюнде гьар колхозчу хозяйство учун къурулажакъ типовой [къалипли — м.а.] уьйлени макети бар. Ону ичинде де ярыкъ яна.

Макетни ярыкъларын сёндюрюп, ягъып, макетни фонтанын чачыратып кепленеген — Зазай, Гиччибек, Мариям, Шекер там газетге бурлугъалар, Зазай къайда бурула буса Гиччибек де шонда бурула…

<[Зазай]>. Гьей Мариям, буланы там газетине къарайыкъ къызы.

<[Гиччибек]>. Зазай герти айта.

<[Зазай]>. (охуй). Ямансувгъа тез заманны ичинде тындырыкълы кёпюр ишлербиз. Девлетгерей яза.

<[Мариям]>. Тракторланы ва оьзге машинлени яхшы кюйде пайдаландырмагъа бригадагъа ким пуршав эте?

<[Шекер]>. Гьали къараса Жангиши язгъандыр.

<[Зазай]>. Айтаман чы Жангиши язгъан.

<[Гиччибек]>. Ва-а! Эркечни сураты. (Зазай тюпден таба Гиччибекге тюртюп Шекерге къарай.)

<[Шекер]>. Не дединг Гиччибек? (Зазай Шекерни алдында токътай.) Къайда тай чы, Зазай.

<[Зазай]>. (бир якъгъа тайып Гиччибекге аста булан). Онча къыччырып нетесен? О чу муну уланкъардашы, яман гёрмеге ярай.

<[Гиччибек]>. (Зазайны къулагъына авуп). Билмей. Неужели [Гертилей де — м.а.] ёлдаш Шекерни хатири къалырмы?

<[Мариям]>. (газетден гезюн айырып ари тая. Кюстюнюп оьз-оьзюне). Гьейлер, артына-алдына къарамай шуну ушатып тургъанман. Сюйгенни гёзю сокъур бола деп шулайгъа айтадыр. (Пауза.) Ёкъ булар не айтса да ондан тизив адам этмеге бажарылар.

<[Шекер]>. (газетден бурулуп кюстюне). Амалы да газетге тюшмей туруп токътамады. (Ары барып олтура. Зазаай ва Гиччибек огъар тынглай.) Гьали муну ачувун да ол менден алма къарамаса.

<[Зазай]>. (Шекерге). Къарамас!

<[Гиччибек]>. Къарамас! Сен вёре, гьеч кепингни бузма. Мунда мурат, мысгъылламакъ тюгюл — тюз ёлгъа салмакь.

<[Шекер]>. Ону мен кёп яхшы билемен, Гиччибек.

<[Зазай]>. Ону анагъыз Къанив бузгъан, сайки уьйню къырпыву, улан яшны кепин бузма ярамас деген зараллы англавлар булан ону ёнкютген.

<[Шекер]>. Билемен, биле, герти айтасан, тек…

<[Мариям]>. (Шекерни сёзюн бёлюп). Шо сагъа бир зат айтса огъар биз этербиз этерлени! Башлап мен.

<[Зазай]>. Мен де.

<[Гиччибек]>. Конечно, Албетде!

<[Шекер]>. Гьейлер, Жангиши неге геч къалдыкен? (Чыгъа.)

<[Зазай]>. Не тамаша! Адамгъа авурлукъ болгъанда, гьар заман сюйген гишиси эсине тюше.

<[Гиччибек]>. Тюше чи дагъы. Масала…(Зазай уъттю къарап йибергенде лакъырны башгъарта.) Билемисен, бу эркеч оьзю де къатын алмай…

<[Зазай]>. Къызардашыны гюнагьына да гире.

<[Гиччибек]>. Шулай гезиклерде къурдашлар актив кюйде вмешать этме герек бола.

<[Зазай]>. Мешать?

<[Мариям]>. Вмешаться, дей.

<[Гиччибек]>. (Мариямгъа). Мариям русчаны бажара. Мени фикрумну бу тюз англагъан…

<[Зазай]>. Сен мешать дединг.

<[Гиччибек]>. Мешать?

<[Зазай]>. (енгилмей). Дюр, мешать дединг.

<[Мариям]>. Нени негер мешать?

<[Зазай]>. Гиччибекге сора.

<[Гиччибек]>. (масхарагъа салып). Балики смешать дегенмендир?

<[Зазай]>. Смешать? Ёкъ, айтмадынг. Ме—е—ша—ать, дединг.

<[Мариям]>. Балики украшать дегенсендир?

<[Зазай]>. Украшать?

<[Мариям]>. (кюлей). Украшать тюгюл, укращать да тюгюл, прощать. Сайки Эркечден гечмек…

<[Зазай]>. Ёкъ тюгюл! Мен кёп яхшы эшитдим — Гиччибек «мешать» деп айтды.

<[Гиччибек]>. Зазай нечик эшитген буса, шолай айтгъанмандыр. Зазай бир де янгылмай. (Бармакъларын «къайчы» этип Мариямгъа гёрсете. Мариям кюлеп йибере. Зазай огъар къарай Гиччибек айтма деп огъар ишара булан тилей.)

<[Эркеч]>. (геле, аз-маз кеби де бар. О Мариямны кюлкюсюне тынглай, оьз-оьзюне). Бу кюлкюсю лап оьлтюре дагъы мени! Просто ирите!

Сюемен кюрлюгюнгню, Сендеги шат кюлкюню, Тюбюнден чечек уьзме Сен энкейген уьлкюню.

Издирастилер! Хош гелдигиз къонакълар бизин юргъа! (Башлап Зазайны, сонг Мариямны къолун ала.)

<[Мариям]>. (Эркечге). Сен де хош гелдинг — курортник.

<[Зазай]>. Къайда той муну къой!

<[Мариям]>. Гьой-ой, узун Лабазан, теркеме тойда не бийий болгъансан дагъы гьанкабут мияма йимик.

<[Зазай]>. Тойда чы хари бу гьалмагъ [балики, агьмакъ сёзню къынгырлашдырыву — м.а.] доммайгъа ошап къала.

<[Мариям]>. Зато [амма, тек, шолай болса да, буса да — м.а.] ишде бу — салгьан хамурну йимик.

<[Зазай]>. Адамшавлу къаргъа кюшлеп де билмей.

<[Мариям]>. (Зазайгъа аста булан). Гьали таман! (Эркечге.) Неге сёйлемейсен?

<[Эркеч]>. (кюстюне). Не айтайым, къонакъ хатири.

<[Мариям]>. Къонакъ этип де боламысыз дагъы?

<[Эркеч]>. Биз — сиз тюгюлбюз. Сизге гёре болмасбыз. Жаныгъыз не сюе! (Мариямгъа.) Сюйсенг буссагьат сен магъа тойгъа барайыкъ деп тиле — гелмесмикенмен.

<[Мариям]>. Буса юрю. (Къолтугъундан ала. Эркеч сююне.)

<[Зазай]>. Гьей, иш бар буларда.

<[Гиччибек]>. Булардан уьлгю алма тарыкъ эдик.

<[Зазай]>. Айтдынг сен де! Булардан уьлгю алып болабызмы дагъы биз.

<[Гиччибек]>. Неге?

<[Зазай]>. Булар улан-къыз, биз къысырларбыз.

<[Гиччибек]>. Гьа, олаймы? Мени гьисабымда минг къызны артгъа сала бир къысыр.

Мариям Эркечни там газетге алып бара.

<[Мариям]>. (Зазайны ва Гиччибекни къулагъына). Шекерге бу къатылгъанча, биз бугъар къатылып муну ачувун бизге бакъдырайыкъ. (Гиччибекге). Сен де иннемей турма, оюн-масхара булан сен де айт, бизин арабызда бирлик барны билсин! (Зазай гьазирлик гёре, ону гёрюп Гиччибек де Элдар да геле.)

<[Элдар]>. (гире). Хош гелдигиз. (Мариямны ва Зазайны колун ала, ахыр да Эркечге де къол узата.) Эсен-аманмысан? (Эркеч гъеч зат айтмай.) Эсен де бол, аман да бол! (Эркеч жавап бермей.) Сиз мен муну булан сораша деп тамаша болмагъыз. Бу да ёкъ эди чи юртда.

<[Мариям]>. Бизин юртда болгъандыр деп эсинге гелеми?

<[Элдар]>. Бу сизин юртгъа дагъы барса да тамаша! Муну сиз къувалагъансыз чы.

<[Зазай]>. Ким хари?

<[Мариям]>. Салим деймисен? О айтгъан затлагъа онча тергев бере турмагъыз. Айтар, тюз тюгюл экенни билгенде къайтма да къайтар. Нечик де Эркеч Жангишини уьюне ярыкъ тартды чы. (Терезеден гёрсете.) Сиз изну берсегиз бизин клубгъа да ярыкъ тартар эди.

<[Элдар]>. (газетге гёзю тие) Бу ким? (Гёзелдириклерин салып охуй.)

«Эркечни тойда бийийген заманы»…

Эркеч дувлап бир затлар айтма сюе, Мариям Эркечни сабур этме чалыша, тирсегине тюрте.

<[Эркеч]>. (тунукъ). Буса ясгъа барма герек, тойгъа барма ярамайгъанны мен билмегенмен.

<[Элдар]>. Ёкъ, Эркеч, сен критиканы терсине англай турасан. Критика этген сайын чыгъынланып турасан? Дагъы-дагъыда къайтып, токъмакълары башынга тийип туражакъ. Сонг сен бир дагъы гьайевлюкню де этгенсен.

<[Эркеч]>. Не гьайевлюк?

<[Элдар]>. «Колхозда ишлемек учун охумаса да ярай, огъар да не охув, не курс тарыкъ эди» деп айтып, Шекерни бир гече дарсгъа гелме къоймай, оьзюнге тойгъа акъча излетгенсен. О Эркечликни, Атаевщинаны [Атайчылыкъны — м.а.] къойма герек, ёлдаш Эркеч! (Тамдагъы планлагъа къарай.)

Эркеч бир якъгъа къакълыгъа. Гиччибек де, Зазай да бираз алдокъда мююшдеги гиччи макетни ярыкъларын ягъып айлана.

<[Зазай]>. Шулай бир квартир болса.

<[Гиччибек]>. Магьачкъалада [Анжикъаладагъы — м.а.] мени квартирим [петерим — м.а.] мундан къалышмай, абзарда шулай борлаларым да бар.

<[Зазай]>. Газ печлери де бар дейсен дагъы?

<[Гиччибек]>. Газ, электричество [электрик — м.а.], кран [сюмелек — м.а.], канализация [кюремет — м.а.], бютюн удобствосу _[онгайлылыгъы — м.а.]…

<[Эркеч]>. (оъз-оьзюне). Шина, шина, атайщина. (Бармагъын хабуп ойлаша. Гиччибек къулагъына авуп Ш—ш—шина. Гиччибек сесгенип гете. Эркеч гъаман ону оъзюне тартып.) Шина деген не затдыр? Атайщина?

<[Гиччибек]>. А киши, тарыкъсыз масхаранг булан бизин лакъырны бёлесен.

<[Эркеч]>. Шина — шина!

<[Гиччибек]>. Билмей сорайсан дагъы? Тиши донгуз деген зат! (Зазайгъа бурула.)

<[Эркеч]>. (оъз-оьзюне) Тиши донгуз? Тюгюлдюр хари? значит: Атай — атам. Атайщина — менмен, тиши донгуз? Ёгъесе оьлген атама да не дей бу? Причем мунда атам? Воллагь гьали чи къойман! (Мариям булан тамдагъы плангъа къарап турагъан Элдаргъа бурула.) Гьали шогъар барып сёйлеймен десем, Мариям тирсегиме тюрте туражакъ…(бирден эс этип.) Агьа, уьйге барагъан ёлун сакъларман. (Гетме юрюй.)

<[Гиччибек]>. Эркеч, сен гетип къалма, буссагьат дарс болажакъ.

Парткабинетге багъып гете. Эркеч огъар ачувлу къарай, артындан юрюй, бирден токътап къала.

<[Мариям]>. (ону эс этип). Эркеч, сагъа не болгъан?

<[Эркеч]>. Сени хатирингни этип чыдадым, Мариям. Тек айып этме, дагъы чыдамагъа болмайман, хатиринг къалмасын.

<[Мариям]>. Не болгъан деймен?

<[Эркеч]>. Эшитдинг чи шо магъа айтгъанны?

<[Мариям]>. Эшитдим.

<[Эркеч]>. Тиштайпаны ягъында, сени ягъынгда…я мен чи эркекгишимен, бир де болмаса къабан деп айтсын дагъы, эркек гишиге тиши донгуз деген не затдыр?

<[Мариям]>. Сени къыздырманг сама ёкъму, Эркеч. (Къолуна тийип къарай.) Сен не сандыракълайсан?

<[Эркеч]>. Я, сен, шо магъа атайшина дегенни эшитмедингми?

<[Мариям]>. Эшитдим. Сен бираз янгылыш айтасан. Атаевщина деди.

<[Эркеч]>. Дагъы, атаевщина деген не затдыр?

<[Мариям]>. Атаевчулукъ деген зат.

<[Эркеч]>. Я…

<[Мариям]>. Гьеч англамайман, тиши донгузну къайдан алып айтасан? Атаевщина олай деген не зат деп нечик эсинге гелди?

<[Эркеч]>. (сыгъанып Гиччибекни уъстюне юрюй). Атаевщина не зат экенни гьали мен гёрсетейим сагъа, донгузму, ёкъ эсе къабанмы? _(Мариям кюлей.)

<[Гиччибек]>. (Зазайны артында къамалып). Сен гертиден сорамейдинг? (масхара этип.) Эркек донгуз! Гьей, Эркеч. Сен бизин лакъырны бёлмек учун сорай деп турадым. (Эркеч Гиччибекге тюртме деп узатыла, Зазайгъа тийип къала.)

<[Зазай]>. Гьей, гьей! Бир Аллагь учун къытыгъым геле, къытыгъым, къытыгъым. Гьуя, мени къой Эркеч!

<[Мариям]>. Гьей, бираз аста болугъуз. (Гиччибек ва Зазай Эркечден тартыла туруп Гиччибекни конторуна гирелер.)

<[Эркеч]>. (Мариямгъа). Не бола, тилеймен, шуну дагъы гиши эшитмесин. Элдарны магъа эпсиз хатири къалажакъ. У-х, еп-енгил болуп къалдым.

<[Гиччибек]>. Ш-ш. Суп-субай да, гюнчырай да геле тура.

<[Къанитат]>. Къайдакен буланы шо каркадил деген газети?

<[Девлетгерей]>. Муна гьана тап оьзю! (Там газетге къарай.) Волла, къатын мунда ону сураты унутулар йимик этилмеген. Къара гьали папахны сындыргъан кююне! Эркечни мююзлери йимик эки мююз болуп къалгъан.

<[Къанитат]>. О не гьайгев хари, Эркечни мююзлери бармы?

<[Девлетгерей]>. Я сен къайсы эркечни айтасан? Мен дёрт аякълысын айтаман.

<[Къанитат]>. Гьа, олай буса чы, герти хари.

<[Девлетгерей]>. Къара, Алыпкъачны чораплары йимик чораплар да гийдирген.

<[Къанитат]>. Къайсы Алыпкъач?

<[Девлетгерей]>. Эсингде ёкъмы? Алыпчап, Алыпкъач.

<[Къанитат]>. Гьа, «Дослар» деген тиатрдагъы? Гертилей Эркечге ошама да ошамай, огъар ошай.

<[Девлетгерей]>. (оьз-оьзюне). Кимге ошатма да къабул, Эркечге ошатмаса. (Къанитатгъа). Я тюбюнде язылгъан зат муну Эркечден тайышдырмай.

<[Къанитат]>. Къайда? Къанда? Къан явгъур, гёзелдириклерим печни хырына салгъан ерде унутулуп къалгъан.

<[Девлетгерей]>. (охуй). «Эркечни тойда бийийген заманы, оьзю къызардашына: «Шекер, иш гюнлерингни берген булан болмай, бу тойгъа да акъча тапмасанг бажарылмай. Же, сен мунда нетесен?»

<[Къанитат]>. Гьуя, зат тапгъанлар газетге салмагъа! Оьзюн де нечик салгъан хари! Мени Эркечим олай эрши бийимей. Гьейлер, гьейлер, улан къардаш-къызардашны арасындагъы иш бу халкъгъа не аварадыр?

<[Девлетгерей]>. Бу чу ярай хари.

Элдар геле.

<[Элдар]>. Эркечге этилген критикагъа сен талчыкъма, Къанив! Эркечге биз сёйлейген кюйде сен де сёйле. Сонг ондан биз бир адам этербиз, бары да жагьиллеге уьлгю болагъан кюйде.

Жангиши ва Шекер гире. Эркеч къызардашына ачувлу къарай.

<[Мариям]>. Не къарайсан, гёзлерингни акъ къабакъны чечеги йимик де этип? (Сумкасындан [дорбасындан, чантасындан — м.а.] гиччи гюзгю чыгъарып Эркечни бетине тута.) Къара чы оьзюнге!. Яманокь аривмю? Сен Элдаргъа тынглап юрю. Ону хадирин бил, сонг да Салим де сени булан башгъача сёйлер.

<[Къанитат]>. (Мариямгъа). Огь, авзунга от тиймеген бал тийсин, къызым. Тьфу, тьфу, гёз тиймесин.

<[Элдар]>. Гьали биз дагъы кимге къарайбыз? Салим гележекге ошамай.

Барысы да тынглайлар, къолунда ат къамучу да булан Салим геле.

Барысы да бугъар бурулалар. Пауза.

<[Салим]>. Салам, огь бу яман сувну яманы! Сувдан сёрюн-сёрюн болуп сал геле.

<[Элдар]>. (Салимге къол берип). Райондан гелегенге ошайсан. Не яхшы болгъан сув ташып. Сув ташымагъан буса гьали де бир багьана тапгъан бусанг ярай эди. Авлакъгъа къачмагъа. (Кюлейлер.)

<[Салим]>. Волга, ари ягъына чыкъмагъа атны тебиндирип де къарадым, нетсем де ат сувгъа гирмеди.

<[Элдар]>. Ессине ошамагъан мал гьарам дей. Гьали кёпюр болгъан буса яманмеди?

<[Салим]>. Волла, гьар бир гьапур-чупургъа чачып юрюмеге акъчабызгъа ачувубуз чыкъмагъан дагъы!

<[Зазай]>. Нечик гьапур-чупур! Сен не сёйлейсен, ёлдаш Салим? Сен чи кёпюрге харж ёкъ, заман ёкъ дей эдинг. Буса тюз айтмагъан болгъансан. Кёпюр салмакъны, сув чыгъармакъны сен гьапур-чупургъа санайсан дагъы?.

<[Элдар]>. Екъ, Салим! Электростанция, клуб, гьамам гьапур-чупур тюгюл. Биз оьзюбюз къайсылай багъып барагъаныбызны биле бусакъ, шолар барысы да бир де артгъа салма ярамайгъан масъалалар.

<[Салим]>. Болса да олар аслу масъалалар тюгюл! Тюгюл, Элдар! Сен кёп алгъа чабасан. Сен гьисап этип къара чы, шо сен айтагъан масъалаларда, мен мюкюрмен, сиз алда барасыз. Амма пачалыкъгъа ашлыкъ беривде, гьабижай чачывда, къайтарывда…(Кисесинден газет чыгъара.) Шу газетдеги сводкада [къысгъа беримлер — м.а.] сиз де, биз де уьстлю-тюплю язылгъанбыз.

<[Элдар]>. Алгъасама, о масалагъа да сводка болур. Шо сводкада сиз къайда болур экенсиз? Ондан сонг, сен бизин авлакъ ишлерибизге мюкюрлюк этмейгенге ошайсан. Къара чы сен бу ишге! (Мююшге бара, къамуш байламны гёрсете.) Бир эки йыллар алда айланадагъы бары да юртлар йымышакъ сибиртгини бизин авлакъдагъы къамуш блшлардан алып эте эди. Бу сагьатгъы бизин сабан топурагъыбыз (харитадан гёрсете) шулай къамушлу батмакълыкълар эди, тюгюлмю, Девлетгерей? Шо топракъланы къурутувда Девейни мангалайындан да аз тер тёгюлмеген. Сонг бу къара тегенекни, бу тюпгючлени гёремисен? Къанивни башы сав къатыныбыз къызыбыз булан ябушуп кёп топракъланы тегенегин къыргъанбыз. Шо ерлеге салгъан бавланы чагъырын ичмеге бу йыл гюзде гелирсен, Салим.

<[Салим]>. (мысгъыллап). «Гюзде» «Тангъала». Магъа сораса тангалагъы тавукъдан бугюнгю йымыртгъа къолай.

<[Элдар]>. Сен шолай ойлашагъангъа тюгюлмю, муна (пландан гёрсете) сизин авлакъны къайдагъы бёлек, къаратегенек басып тура. Сен авлакъланы тазалавгъа бир иш гюн де харжламагъансан. Бу бой барысы да бир тутгъан болуп сюрюлежекми, Жангиши?

<[Салим]>. Не? Олай деген не? Эки колхозну авлагъы бир тутгъан болуп сюрюле деген не?

<[Элдар]>. Болсун дагъы. Эки де колхоз оьзлени севооборотларын бир-бири булан сёйлешип къурса, эки де колхоз оьзлени шу авлагъын бир йимик культура чачылагъан авлакъ этме бола. (Эркеч планлар илинген тамны ярыкъ эте.)

<[Салим]>. (аччы кюлей). Я, сиз къыздырып алып барасыз. Гьа гьали, айтагъаныгъызны айтып битчигиз!

<[Элдар]>. Биз айтмагъа сюеген зат — эки де колхоз севооборотларын оьзлени топракъ шартларына гёре, сёйлешип къурмакъ.

<[Жангиши]>. Гьали къарагъыз, «Янгы Яшав» колхозну чачыв участкасы она овунда, «Ярыкъ Ёлну» ашлыкълары мунда. Бырынгылар да айтгъанлай бириси машрыкъда, бириси магърыбда.

<[Эркеч]>. Бир-бирини арасында гюнню узагъында ат чапдырып турмагъа ёл бар.

<[Жангиши]>. Эки де колхозну машин техникасын негьакъ ари-бери ташламай асувлу кюйде пайдаландырмакъ учун, эки де колхоз бир йимик культуралар [оьсюмлюклер — м.а.] чачылагъан участкаларын янаша да ерлешдирсе.

<[Девлетгерей]>. Тюз! Сугъарыв ишлер учун да бир бойда болса яхшы.

<[Салим]>. (аста оьз-оьзюне). Бажарылмас.

<[Мариям]>. Культура ярыкъландырыв ишлери учун да шолай багъыйлы болажакъ.

<[Салим]>. (оъз-оъзюне аста кюйде). Бажарылып битмес.

<[Элдар]>. Колхозчулагъа гьар гюн, гьар сагьат тарыкъ болагъан агроном кёмек учун да шолай багъыйлы.

<[Салим]>. Я, сиз гертилей де якъ-якъдан алып барасыз. Экиде колхозгъа бир сынав участка дей. Бу агроном учун дей, Жангиши техника учун дей.

Жангиши бир колхозну механизатору. Девлетгерей де сувчу буса бир колхозну сувчусу, оьзлени башына тимейген затлагъа гиришелер. Мен шулай айтаман. Атамны ари ягъына элтип чачсам да онда бригадир де етишме ге- рек, агроном да. Гьар колхоз оьзюне онгайлы кюйде ишлей.

<[Элдар]>. Янгылышсыз ёлдаш Салим, бир-бирине онгайлы кюйде ишлеме де герек, ондан сонг машин техниканы артыкь даражада пайдаландырагъан кюйде.

<[Салим]>. Яхшы буса, чачыв участкаларыбызны ювукълашдырайыкъ, сюйсегиз колхозланы да бирлешдирейик. Чыгъыгъыз бизин ягъыбызгъа.

<[Элдар]>. (Салимге). Сен ачывгъа оьчге йимик олай затланы айтма. Участкаланы къайсы ювукълашма герегин агроном белгилежек.

<[Салим]>. Белгилемежек, мен рази болуп чу!

<[Элдар]>. Сен негер рази болагъанны мен чи билмеймен. Мен сагъа, шу бизин электростанцияны кёлю учун сизин якъдан бу якъгъа бираз сув чыгъарайыкъ, сиз бизин булакъдан оьзюгюзге сув тартыгъыз дедим. Ону гьакъындан да бир затлар сёйлеп юрюгенсен.

<[Салим]>. Юрюген бусам бар, оьрге арз эт.

<[Гиччибек]>. Ёлдаш Салим! Айтыгъыз гьали сиз шу газетде сводкадан къайры дагъы да не затны охугъансыз? (Пауза.) Мунда хоншулар нечик болмагъа герекни гьакъында бек тизив макъала бар.

<[Мариям]>. Ёлдаш Салимни даим де хасияты — газетде янгыз оьзюню колхозуну гьакъында язылгъан затны охуп кьоя. О заманда да эгер оьзюн макътаса.

Салим Мариямгъа ачувлу къарай. Мариям айтгъан, сёзден Эркеч кеп алып турагъанны эс эте.

<[Салим]>. (Эркечге). Сен о айтгъан затдан кеп алмай там газетдеги оьзюнгню суратынгдан кеп алсанг?

<[Къанитат]>. (Салимни алдына барып, бичимине къолларын да салып оралып). Гьей гиши, сен шу мени яшымдан не сюегенингни айт гьали.

<[Салим]>. О соравну сен бу газетни чыгъарагъанлагъа бер, яшынгны сёгюп элекдей этген.

<[Мариям]>. Сёгюп тюгюл, ёлдаш Салим, критикагъа сёгюшюв деп айтма ярамай.

<[Салим]>. (къолларын мююз этип). Мугь! Не башгъадыр. (Чыгъып гете.)

Перде