Эпилог

Арадан бир нече йыл гетди…Майны булутсуз гюнлерини биринде Марусино деген юртгъа гёк «Победа» гелди. О янгы школаны алдында токътады. Школагъа гиреген авузну уьстюне «Хош гелдинг аявлу къонакъ!» деген къутлав сёзлери булангъы транспорт илинген.

Машинден бухари папахлы тамаза да эки улан яш да тюшдю. Олардан сонг бираз сынтыкълай бир дагъы бирев тюшдю. Ону тёшюнде Совет Союзну Игитини алтын юлдузу йыртыллай эди.

Гелгенлени колхозчулар, учителлер [муаллимлер — м.а.] ва пионер вожатый къаршылады. Хош-бешден сонг барысы да къавгъасыз гиччи майдангъа юрюдюлер. Чечеклер булан безенген, арив сакъланагъан къабургъа етишип токътадылар. Язывлары булангъы сынны тюбюне Арсен де, Виктор да жанлы сакъланып гелген дагъыстан чечеклени уллу дёгерек байламларын салдылар. Тамаза Темиргерей къабурну этегине таба бир чонкъ къазып, Бавюртдан алып гелген бала жие терекни орнатды.

Гиччи беш бучгъакъы къызыл юлдуз булан безенген акъ сыгъал сынны ягъында барысы да башларын да чечип сёзсюз шып токътагъанлар. «Совет ватан учунгъу давгъа тюшюп оьлген игит танкистге оьмюрлюк макътав!» деп язылгъан варакъ тюслю язывда язбашны гюню йылтынланып ойнай.

Ез зурнайын ва накъырасын согъа туруп, алда елпиллейген байрагъы да булан пионер дружина етишди. Байракъчы байракъны къабургъа иелтди ва пионерлени тизиминде салют береген къоллар бала тереклени агъачлыгъы йимик гётерилди.

Биринчи сыдырадан улан яш да, къыз яш да чыгъып, сынны эки ягъында абурлав къаравулда токътадылар. Чув шыплыкъда пионер вожатый къызны гесип-гесип абат алагъаны эшитилди. Ол Элмурзаны ягъына ювукъ барып: алгъасамакъдан назик чыкъгъан аваз булан, къычырып айтды:

— Советлер Союзну [Совет Бирликни — м.а.] Игити ёлдаш Элмурза Жумагулов, уьстюнлюкню гюнюне багъышлангъан къуванчлы ленейканы оьтгермеге Аркадий Карасёвну атындагъы пионер дружина гьазир токътагъан.

Элмурза кисесинден чыгъаргъан явлукъ булан гёзюнден чубургъан гёзьяш бюртюкню тез сибирип, аз сынтыкълай туруп, пионерлени тизимине ювукъ барды…

БИТДИ.

^✻: Пиндия - Финляндия