Epilog
Aradan bir neçe yıl getdi…Maynı bulutsuz günlerini birinde Marusino degen yurtğa gök «Pobeda» geldi. O yañı şkolanı aldında toqtadı. Şkolağa giregen awuznu üstüne «Xoş geldiñ ayawlu qonaq!» degen qutlaw sözleri bulanğı transport ilingen.
Maşinden buxari papaxlı tamaza da eki ulan yaş da tüşdü. Olardan soñ biraz sıntıqlay bir dağı birew tüşdü. Onu töşünde Sovet Soyuznu İgitini altın yulduzu yırtıllay edi.
Gelgenleni kolxozçular, uçiteller [muallimler — m.a.] wa pioner wojatıy qarşıladı. Xoş-beşden soñ barısı da qawğasız giççi maydanğa yürüdüler. Çeçekler bulan bezengen, ariw saqlanağan qaburğa yetişip toqtadılar. Yazıwları bulanğı sınnı tübüne Arsen de, Wiktor da canlı saqlanıp gelgen dağıstan çeçekleni ullu dögerek baylamların saldılar. Tamaza Temirgerey qaburnu etegine taba bir çonq qazıp, Bawyurtdan alıp gelgen bala ciye terekni ornatdı.
Giççi beş buçğaqı qızıl yulduz bulan bezengen aq sığal sınnı yağında barısı da başların da çeçip sözsüz şıp toqtağanlar. «Sovet watan uçunğu dawğa tüşüp ölgen igit tankistge ömürlük maqtaw!» dep yazılğan waraq tüslü yazıwda yazbaşnı günü yıltınlanıp oynay.
Yez zurnayın wa naqırasın soğa turup, alda yelpilleygen bayrağı da bulan pioner drujina yetişdi. Bayraqçı bayraqnı qaburğa iyeltdi wa pionerleni tiziminde salüt beregen qollar bala terekleni ağaçlığı yimik göterildi.
Birinçi sıdıradan ulan yaş da, qız yaş da çığıp, sınnı eki yağında aburlaw qarawulda toqtadılar. Çuw şıplıqda pioner wojatıy qıznı gesip-gesip abat alağanı eşitildi. Ol Elmurzanı yağına yuwuq barıp: alğasamaqdan nazik çıqğan awaz bulan, qıçırıp aytdı:
— Sovetler Soyuznu [Sovet Birlikni — m.a.] İgiti yoldaş Elmurza Cumagulow, üstünlüknü gününe bağışlanğan quwançlı leneykanı ötgermege Arkadiy Karasöwnu atındağı pioner drujina hazir toqtağan.
Elmurza kisesinden çığarğan yawluq bulan gözünden çuburğan gözyaş bürtüknü tez sibirip, az sıntıqlay turup, pionerleni tizimine yuwuq bardı…
BİTDİ.
✻: Pindiya - Finländiya