Орамны эдеплери

Гишиге урунуп йыгъылардай яда йыгъардай даражада алгъасап, тергевсюз юрюмегиз. Нагагь янгылыш биревге урунсагъыз, гечмекни талап этмекни^✻ бир де унутмагъыз. Муну учун тюркче-къумукъча – «афу этигиз», «гечигиз», яда «багъышлагъыз»; орусча – «виноват», прансузча^✻ – «пардон» дейлер.

Токътап бир гишини [артындан] къарап къалмагъыз. Гьеч бир гишини, айрокъда къатын-къызны юзюне тиклеп къарамагъыз. Гьеч бир гишини опурагъы, кеби^✻ булай деп мысгъылламагъыз.

Таягъыгъызны яда гюнлюгюгюзню^✻ гьавада айландырып юрюмегиз, яда къолтугъугъузгъа къысдырып, гишиге тийдирмегиз. Орамда юрюйгенде этеклеригизни салландырып, башыгъызны энкейтип, къабурун излейген гиши йимик бир мисгин суратда юрюмегиз. Орамда юрюйгенде къакъырмагъыз, тюкюрмегиз, бурнугъузну сибирмегиз.

Орамны ортасында яда тротуарны уьстюндеги гирип-чыгъып юрюйген бир къапу(ну) яда эшикни тюбюнде токътап сёйлешип турмагъыз. Сёз сёйлемек учун къатынланы орамда токътатып турмагъыз. Сёйлежек сёзюгюз болса, бираз узатып, юрюп сёйлегиз.

Баргъаныгъызны арив гёрежегин билмей туруп, гишини уьюне бармагъыз. Ишлейген заманында гишини токътатып сёйлешип турмагъыз.

Себеплерин белгили этмей туруп, досугъуздан айрылмагъыз. Гьеч [гишини], айрокъда къатын-къызны сырын билмек учун къаныкъмагъыз; эгер оьзлер сёйлеселер, гьеч гишиге яймагъыз. Сыр сакълавну мукъаддас^✻ бир борч деп билигиз.

Исбайы кюйде боламан деп, адамны кюлкюсю гелеген ишлени этмегиз. Тиятыргъа^✻ баргъанда, оюн башлангъандан сонг тавушугъузну чыгъармагъыз. Перде тюшгюнчеге тиятырдан чыкъмагъыз.

Фагьишалыкъ^✻ этеген муслиман къызланы гёрюп тергев алыгъыз, аланы юзде токъсан беши^✻ – эрлерини зулмусу, жагьиллиги^✻ себепли шо гьалгъа тарыгъанлар. Агъар^✻ гёре, къатынланы гьакъында бек языкъсынагъан болуп, адиллик гёрсетмеге къаст этигиз.