Расулну алайгьиссалам дюньягъа гелмеги

Бир-эки сёз сёйлейим Пайгъамбарны гьалындан, Белгили гьадислерден, Китапларда барындан.

Ол Расулну дюньягъа Гелмеги ювукъ болду, Оьзю къурсакъда туруп, Атасы Абдуллагь оьлдю.

Рабиъул-аввал айда, Итни гюн эртен чакъда Расул, дюньягъа гелип, Малим болду гьар якъда^✻.

Сююнюп къолгъа алды Абдулмутталиб^✻ гелип. Шайтанлар яс этдилер, Аны тувгъанын билип…

Анасы Аминатдан Расул дюньягъа инди^✻. Минг йылдан берли янгъан Парсланы оту сёндю^✻.

Кисраны^✻ уллу къаласы Ярылды ер-ерлери, Он дёртю ерге тюшюп, Сынды терезелери.

Саваны денгизини Суву ерге батылды, Шайтанлагъа шо гече Кёкден отлар атылды.

Расулну тувмакълыгъын Хабар берди кагьинлер^✻. Бу гетген сонг бармады Кёкге тынглама жинлер.

Жугьутлар кёп изледи, Оьлтюрмеге къаст этип. Аллагь сакълагъан затгъа Адам боламу етип.

Сегиз йылгъа гелгенде, Абдулмутталиб оьлдю. Сакъламагъа Расулну Абуталибге^✻ берди.

Макка агьлюню ичинде Амин эди муну аты, Яшдаокъда^✻ гёрюнеди Белгили муъжизаты.

Кёп гьюрметли эдилер Бугъар вагьйу^✻ гелгинче, Пайгъамбарлыкъ берилип Муну гьалын билгинче.

Йигирма беш яшында Шамгъа^✻ сапаргъа барды; Шол сапарындан къайтып, Хадижат къатынны алды.

Шол сапарда гёрсетди Нечесе уллу ишлер. Гёрюп, гьакълыгъын билип, Динге къайтды кешишлер.

Пайгъамбарлыкъ берилди, Къыркъ яшына гелгенде. Макка агьлю дюшман болду, Муну гьалын билгенде.

Асгьапгъа да, бугъар да Кёп къыйынлыкъ этдилер, Бир табун муслиманлар Гьабашиге^✻ гетдилер.

Буса да яшырмады, Гьакъ динни загьир этди. Шулай къыйынлыкъ булан Сегиз-тогъуз йыл гетди.

Салат саламлар болсун – Расулгъа, агьлусуна, Сыйлы асгьапларына, Яшына, уллусуна!