Варисликни эки ёлу жыйылгъанланы баяны

Бир гишиде пай ессилик де, асабалыкъ да жыйылса,— эки де якъдан варислик этер. Масала, къатыны оьлюп къалгъан эр — шол къатунну атасыны къардашындан къалгъан улан болгъан заманда йимик.

Бир гишиде эки тюрлю асабалыкъ жыйылса,— гючлюсю булан варислик этер. Масала, бир гиши оьлюню къардашы да болуп, азат этген бий де болгъан заманда йимик.

Къардашлыгъы бийлигинден гючлю болмагъы альякъда англанды. Бир гишиде эки тюрлю пай ессилик жыйылса да,— гючлюсю булан варис болур. Биринден бири гючлю болмакъ — бириси бирисин гьажбу эте буса да болур. Масала, бир гиши къатуну деп хыял этип анасын ятгъан сонг бир къыз тувуп, сонг шол гиши оьлсе,— шол къыз аны къызы да бола, ана бир къызардашы да бола. Амма янгыз къызылыкъ булан варислик этер. Бири биринден гючлю болмакъ — бириси бир-бирде гьажбулана буса да болур. Масала, бир къатун оьлюню уллу анасы да болуп, ата бир къызардашы да болса,— аналыкъ булан варислик этер. Биринден бири гючлю болмакъ — бирин гьажбу этегенлер аз болуп, бирисин гьажбу этегенлер кёп буса да болур. Масала, бир къатун оьлюню уллу анасы да болуп, ата бир къызардашы да болса,— уллу аналыкъ булан варислик этер. Эки якъдан пай ессилик жыйылгъан гишини гючлю ягъы, башгъа бир гиши булан гьажбуланып къалса, заип ягъы булан варис болур.

Эки тенг асабадан бирисини оьлюге башгъа бир якъдан да ювукълугъу болса, шол ювукълукъ саялы къалгъан бир асабадан озуп, аны малдан магърюм этмес. Масала, оьлюню атасыны эки уланны бириси оьлюге ана бир къардаш да болгъан заманда йимик. Ана бир къардашлыкъны пайын алгъан сонг къалгъан затны экиси де тенг уьлешип алырлар.

Булар булан бирче оьлюню къызы да болса, бу къыз булан ана бир къардашлыкъ гьажбу этилип, малны яртысы къызгъа болгъан сонг, къалгъан яртысы экисине де тенг уьлешинир.