Асия

Асияда он вилаят бардыр:

АВВАЛГЪЫНЧЫСЫ АСИЯЙИ-РУСИ^✻. Асияйи-Руси уьч башгъа айрылгъандыр: Сибирь, Туркестан^✻, Къапкъаз. Булар бар да Русийа къолундадыр. Сибирни топрагъы да бек уллу болса да, халкъы беш мильяндыр. Туркестанны халкъы етти мильяндыр. Туркестанда эки мильян халкъы булан Бухара ханлыгъы^✻ бардыр. Тахшагьары Бухарадыр. Къапкъазны халкъы алты мильяндыр. Бизин Дагъыстан да Къапкъаздандыр.

ЭКИНЧИСИ АСИЯЙИ-ОСМАНИ^✻. Асияйи-Османи уьчге айрылгъандыр: Анадолы^✻, Сурия^✻, Арабыстан^✻. Булар бар да Туркийа къолундадыр. Анадолыны халкъы он беш мильяндыр. Кёбюсюню дини исламдыр. Сурияны халкъы эки мильяндыр. Кёбюсюню дини исламдыр. Бизин Мугьаммад пайгъамбар алайгьиссалам оьзюнде тувгъан Макка да, оьзюнде дюньядан гетген Мадина да Арабыстанда эки шагьарлардыр.

УЬЧЮНЧЮСЮ ЧИН — КЪЫТАЙ^✻. Чин вилаят — халкъы кёплюк ягъындан биринчи пачалыкъдыр. Халкъы дёрт юз мильяндыр. Тахшагьары Пакиндир. Дини мажусдур. Пачалыгъы мустакъилладыр. Чинде илмуну, гьюнерни азлыгъындан, пачалыгъы къувватлы тюгюлдюр. Чинде элли мильян бусурманлар да бардыр.

ДЁРТЮНЧЮСЮ ЯПОНИЯ. Япония — къувватлы пачалыкъланы бирисидир. Халкъы отуз сегиз мильяндыр. Тахшагьары Токиодур. Дини мажусдур. Пачалыгъы мустакъилладыр.

БЕШИНЧИСИ ГЬИНДИСТАН^✻. Гьиндистанны халкъы эки юз элли мильяндыр. Элли мильяны бусурманлардыр. Къалгъаныны дини мажусдур. Бу вилаят бары да Ингилизни къолундадыр.

АЛТЫНЧЫСЫ ГЬИНДИЧИНИ^✻. Гьиндичинини халкъы къыркъ мильяндыр. Дини мажусдур. Оьзю алтыгъа бёлюнгендир. Алардан бириси Ингилизни къолундадыр. Къалгъанлары увакъ-увакъ мустакъилла пачалыкълардыр. Гьиндичиниде Жугъур деп бир гиччи бусурман пачалыкъ да бардыр.

ЕТТИНЧИСИ ИРАН. Иранны халкъы сегиз мильяндыр. Тахшагьары Тегьрандыр. Дини исламдыр. Пачалыгъы мустакъилладыр. Иран — аввалгъы заманларда бек кёп алимлер болгъан бир вилаятдыр.

СЕГИЗИНЧИСИ АФГЪАНИСТАН. Афгъанистанны халкъы алты мильяндыр. Тахшагьары Кабилдир. Дини исламдыр. Пачалыгъы мустакъилладыр.

ТОГЪУЗУНЧУСУ БАЛУЖИСТАН^✻. Балужистанны халкъы бир мильяндыр. Тахшагьары Келатдыр^✻. Дини исламдыр. Пачалыгъы мустакъилладыр. Оьзю Ингилизге къарайдыр.

ОНУНЧУСУ КЪОРЕЯ. Къореяны халкъы он мильян ярымдыр. Тахшагьары Сеулдур. Дини мажусдур. Пачалыгъы мустакъилладыр.