Авлуну баяны

Тарака оьзлени бирине уьлешинеген етти санавдан уьчюсю бир-бир заман бир аз артыкъ оьрге минеген кюю бар. Шол заман пайланы санаву къадарлары аз бола. Шол кюйде болуп оьрге минмакъгъа — авлу деп айталар.

Артыкъ оьрге минеген уьч де санавдан аввалгъынчысы — алтыдыр. Алты артып гетип еттиге минеген кюю де бола. Сегизге минеген кюю де бола. Тогъузгъа минеген кюю де бола. Ончъа минеген кюю де бола. Къайсына минегени — пай ессилени пайларын гьысап этсе билинип къала. Масала, бир къатун оьлюп, эр де, ата якъдан эки къызардашы да, анасы да, ана якъдан эки эркъардашы да къалгъан ердир.

Экинчиси — он экидир. Он эки де артып он уьчге минеген кюю де бола. Он бешге минеген кюю де бола. Он еттиге минмагъына бир мисал: бир гиши оьлюп, къатуну да, ата ягъындан эки къызардашы да, анасы да, ана ягъындан эки эркъардашы да къалгъан ердир.

Уьчюнчюсю — йигирма дёртдюр. Йигирма дёрт артып барып йигирма еттиге минеген кюю де бола. Масала, бир гиши оьлюп, къатуну да, атасы да, анасы да, эки къызы да къалгъанда йимик.