Тюлкю, бёрю ва арсланкъаплан

Бир тюлкю де, бёрю де, арсланкъаплан да гьавгъа баргъанлар. Олар бир къубагийик, бир юр, бир къоян туталар. Буланы гелтирип, арсланкъаплан бёрюге пайла деп, алдына теберген.

Бёрю де пайлай: къубагийикни агъайгъа деп, арсланкъаплангъа ташлай, юрню де бёрю оьзюню алдына тарта, къоянны да, шу да тюлкюге деп, ташлай.

Сонг арсланкъаплан бёрюге: — Башынгда бир зат бар, гел гьали, тайдырайым, – дей.

Бёрю: — Магь, тайдыр, – деп, арсланкъапланны алдына башын сала. Арсланкъаплан къолу булан уруп, бёрюню башын увaта.

Сонг арсланкъаплан тюлкюге: – Ал чы, сен пайла чы, – дей.

Тюлкю де алып: — Бу – агъайгъа, — деп къубагийикни ташлай. — Ону арты булан заман-заманда ашай турарсан, — деп, юрню де арсланкъаплангъа ташлай. — Бу да – магъа. – деп, оьзюне къоянны ала.

— Сагъа бу пайлавну ким уьйретди? — деп сорай арсланкъаплан. — Воллагь, шо бёрюню башы уьйретди, – дей тюлкю.