Бузав, къозу ва бёрюлер

Арсланбек деген гишини бир бузаву да, бир къозусу да болгъан. Бир гюн олар отлавда отлай болгъан. Отлай туруп, олар хыйлы ерге юрюген. Ёлда олар тавшан тери де табып, ону да къолтугъуна къысдырып, юрюй болгъанлар. Юрюй туруп, ахшам болгъанын билмей къала. О ерде бир тёле бола. Олар шонда гире. Къараса, ички ичеген тогъуз бёрю бар. Салам да берип, тавшан терисин де эшик артгъа сюеп, бузав да, къозу да гирип, буланы ягъында олтура.

Бёрюлер къонакъларын писиремей, оьзлени къомузчусуна айта:

— Бузавгъа сокъ, бузавгьа сокъ! — деп.

— Хинти-минти, хинти-минти, Къозу таман къушлукъгъа, Хинти-минти, хинти-минти, Бузав таман къушлукъгъа,

— деп согъуп, йырлай къомузчу бёрю.

Олар оьзлени ашама сюегенни билип, бузав айта:

— Беригиз, гьали мен де согъайым! — деп.

Бёрюлер бузавну билегени болмаса да, бизге бир кюлеме затдыр ашагъынча деп, къомузну узаталар. Бузав согъа:

— Хинти-минти, хинти-минти, Тогъуз тери — тонлугъум, Хинти-минти, хинти-минти, Эшик артда — ягъалыкъ!

— деп йырлай.

Бёрюлер эшик артгъа къарайлар — тавшан тери бар. "Не гючлю жанлардыр булар! Бизин тогъузубузну да оьлтюрюп, терилерибизден тон этме тура! Гелигиз, къачайыкъ!" — дей, бир-бирине шыбышлап, туруп тогъуз да бёрю, къачып гете.

Сонг бузав къозугъа айта:

— Булар чы къачды, тек дагъы да кёп болуп гелир деп эсиме геле. Шо заман бизин гьиллабыз озмас. Гел, мундан таяйыкъ, — деп. Олар тёледен чыгъып, бир терекге минип токътай.

Бир замандан бёрюлер он эки болуп геле. Тёледе буланы тапмай, бёрюлер гелип шо терекни тюбюнде айланышалар.

Бирден къозуну сув яраву гелип йибере.

— Исевюм геле, не этейим? — деп сорай бу бузавгъа.

— Ерге тюшсенг, бёрюлер сени ашап къояр, бир бутакъны тутуп сама эт! — дей бузав.

Къозу этме онгарыламан деп, бутагъы-заты булан ерге тюшюп гете. Бёрюлер эс тапгъынча, бузав эс таба да, къозугъа къычыра:

— Семизин тут, семизин тут! — деп. Бёрюлер:

— Булар не игит жанлардыр, къоюп сама таяйыкъ! — деп къачып гетелер.

Бузав терекден де тюшюп, къозу булан бирге тавшанны терисин де алып, Арсланбекни абзарына къайтып геле.

Онгмай-оьсмей бёрюлер къала, онгуп-оьсюп, гененип къозу да, бузав да къала!