«Usumu ullu Xasaybek».
Qarağay bulan teñ ösgen, Qabuğu maylı qarınlım, Tatar atday bel buwğan, Tasmalı yel ayınlım. Teñli xanlar içinde Hürmeti artıq, sıylı ullum. Boylulağa boyun çüyurtmes, Buğalayın boyunlum. Usumu ullu Xasaybek Orus paçağa ne etdi: Er-xan atın ör etdi, Generallıqğa yetdi. Eki biçe beş qıral Gezigi bulan getdi. Teñleşgen külpetidey Sırın-göñün añlatdı, Söyletip saq tıñladı. Xunkerge yol bersin dep, Masgewge xat çegildi Yetti peçet içinden. Xunkeribiz tıñladı, Güçlü orus paçağa. Xat yiberdi görsün dep, Xunkerge göçüp barma Özüne yol bersin dep, Gelme uşatğan busurman Artımdan iyersin dep Qast etdi etermen dep, Duşmandan ötermen dep. Qudratlı xudayım. Yol berse, getermen dep. İstanbul tax şaharğa Tebinsem yetermen dep. Biy Xasaynı yüregi Belgili şolay edi. Xasaynı bir sawluğu Köp xalqğa qolay edi. Quwunlar dese qısılmay, Quwana quwğan alp edi. Qaçğanlanı artından Quwup yetgen çalt edi. Yawğa yañız bir özü Yan tirkemes nart edi. Biykeler tapğan asil biy Bırınğılanı artı edi. Bırınğı biy batırım, Arpınlanğan ayğırım, Aq gümüş som altınlım Yah-namusğa yorta edi. Yaşlar bulan yaş edi, Yaşı ullu ağalağa Haqıl bergen baş edi. Xasaynı duşmanları Tüz etgen soñ işlerin Ne duwansız, ne yolsuz, Qayratlı Xasay biyge Batdırdılar tişlerin. Öktem turğan er Xasay Enni getmey turman dep, Paça bergen köp dolluq – Xorluqda aşaman dep, Osal erler ör bolğan Bu elde yaşaman dep, Tiflisde ullu sardarğa Ekinçi arza berdi. Arzasını cawabı Tez tüşdü bulay geldi: Qıñır uçun, tüz uçun, Birewleni sözü uçun, Getmesin dep, qalsın dep, Xasayğa tilep yazdı Bizin bulan bolsun dep. Şo sözler açuw tiydi, Xasay içinden güydü, Osmanlı topuraqğa Neçik de getme süydü. İnarallar sardarğa İş etip kağız yazdı. Xan ullu Xasay uçun Qaytarıp kağız aldı. Añlasın dep, görsün dep, Xasay xunkerni qoyup, Paçağa üyürsün dep. Aytğannı añlamasa, Buyruqğa tıñlamasa, Woronej orus şaharğa Toqtatmay yibersin dep. Xasaynı yiberdiler Woronej degen eline. Don tarqalıp, qan aqğır Araseyni törüne. Boljallı boz topuraq Boljal tartğan yerine. Barıp bir ay bitginçe, Ekinçi ayğa yetginçe, Accallı awruw tapdı. Arslanımnı açuwu Arğıp yürekge çapdı. Arslanımnı artından Accal ölüm quwğanda, Azireyil maläyik Canıñ ber dep tuwğanda, Canıday qara xalqına Qara qayğı yawğanda, Qayğısı artdı, dert qopdu, Tayanğan din terekdey Xasay Haci awğanda. Buğar bulay bolğan soñ, Oylay bizin bolur dep Üç ulandan birisin Oylap soldat alır dep, Paylap polkuna qoşup, Eltip dawğa salır dep. Ah seni, ah seni ya Arslan Xasay ör almay, Alıslarda aq çatırın quralmay. Alpawutday kelpetlim, Ajdahaday yüreklim, Bu kimdir dep soramay. Mingen atı qalğınça, Bel awrup, çarx talğınça, Bir canğa bir can almay, Yanğa yañız bir özü Tuwra çabıp sınalmay. Kimler aytma bola edi Araseyde, yat elde Xasay biyim ölür dep. Tuwğanına hasiret Tarlanıp canın berir dep.
Qarağayğa teñ – wrowen, wısok tı kak listwennisa.
Tasma – eçki teriden yarıp, gesip etilegen sızaq tar qayış (tesma).
Ayın, ayıl – yer begetiw, tutduruw, baylaw qayış (podpruga sedla).
Boyun çüyurtmes – pay bermes degen maʼnada.
Buğalayın – buğaday (kak u bugaya teloslojeniyem).
Eki biçe beş qıral – ölçewler?
Er-xan atın ör etdi – maqtatdı (proslawil).
Külpet – 1. üyahlü – semya; 2. külpet – iş kollektiv.
Xunker – xunkar, şo waqtidegi türk paçası.
Maskewge xat çegildi – Maskewge telegramma yazıldı, yiberildi.
Artımdan iyersin – artım bulan gelsin, yürüsün.
Qudratlı xudayım – Zor güçlü qudratnı yesi Allah (Wsemoguşiy Allax).
Qısılmay – qorqmay, qorqunmay, tartınmay.
Alp – nart, igit (bogatır, welikan, geroy).
Quwup yetgen – artından yeldey çalt yetegen.
Yan tirkemes nart – yansız, yañız özü bajarağan nart edi.
Bırınğılanı artı edi – aldınğılanı inamlı warisi edi.
Arpınlanğan ayğırım – alpıllap arğıp çapğan ayğırım.
Qayratlı – güçlü, quwatlı.
Som altın – zoloto-samorodok.
Duwansız – töresiz, sudsuz.
Dolluq – munda: baylıq, dewlet.
Xorluq – ilıq, esgiklik, biyaburluq, şarayıplıq (pozor, sram, unijeniye).
Sardar – namestnik.
Osmanlı topuraq – Turkiya.
Paçağa üyürsün dep – paçağa boysınsın, iy bolsun, tıñlasın, yan bolsun dep.
Don tarqalıp – Don özenni suwu tartılıp, kemip, onu ornunda qan ağır dey.
Aresey – Rusya.
Boljallı boz topuraq – boljal tartğan qara topuraq, artda da gömülejek yeri.
Açuwu arğıp yürekge çapdı – öçlügü tez, çalt yürekge çapdı, bek awur, yaman tiydi.
Azireyil maläyik – can alağan maläyik.
Canıday qara xalqına – ayawlu, aziz xalqına.
Dert qopdu – qayğığa, dertge tarıdı, batdı.
Oylay bizin bolur dep – bizin uçun oylar dep.
Alıslarda aq çatırın quralmay – yıraqlarda (Turkiyada) aq çatırın qurma buyurmay.
Alpawutday kelpetli – dewdey, nartday ullu boylu, sanlı, yüzlü.
Ajdahaday yürekli – kak u drakona serdsem.
Çarx – san, qarqara.
Tuwğanına hasiret – munda tuwğan-ösgen makänına, eline, awletlerine hasiret demek.
Tarlanıp can berer dep – talçığıp, qıynalıp, yılamsırap (w peçali, ogorçenii umröt).