«Qarağaylar boyu qaq elme».
Qarağaylar boyu qaq elme, Qamalışğan günlerde, Qazağım, Dostuñ qoyup saw gelme. Qarğanaqlar boyu qarğa uya Qarğa yudap sınsa da, Qaqlığıp qazarxıday iyelme! Çağılğan majar oqğa may toñsa, Çirikli çınarlağa süyelme. Qamalğanlar görseñ, biy bolma, Qawğada qaçğan bulan iy bolma. Çilledey çırmawuqğa çiriygen Çınarlağa oşama. Çınarlanı çapsa qıyar qılıçğa, Çıq tiygen kağızlarday boşama. Qılıçlar bulan gengleşseñ – Qıyğanıña boyalma. Yazide sağa söz yetse, Aytğanıña uyalma! Yararmı qılsız xomuz küyleme, Yamanlağa göre söyleme? Yamanlar bulan yazda xaşınma. Yazide sağa yaw yetse, Canıña sebep izlep yaşınma. Çağıwçular bulan üyleşme, Çali içinde ariw bulan küyleşme. Qurdaş-dos dep inanıp, Qırdağı qapğın işiñ söyleşme. Emmekdir, emsiz awruw tapdırar, Hökündürüp barmaqların xapdırar. Canıñ uçun qardaş, yoldaş şol bolur: Cayalı oqday sağa bolğan soñ, Şamlanğannı urup atdan salğan soñ, Dağı da dos-qardaşıñ şol bolur. Tarıqlı gün taymay tayaw bolğan soñ, Aşnalanı anadaşday görgün sen, Aşgere göñün alıp bilgen soñ, Qawğalaşğan günlerde Sen degenni yağasından alğan soñ, Qarşıñda aziz canın bergen soñ.
Qarağay terek – listwennisa bolma gerek.
Elme terek – karağaç, wäz.
Qamalışğan günlerde – qurşalğan, qamawğa alınğan, tüşgen günlerde (kogda w okrujenii, w osade).
Qarğanaq (ösümlük) – arça (mojjewelnik).
Qarğa yudap sınsa da – köp qarğa yaburulup qonup, awurluğundan sınsa da.
Qazarxı – oqjaya (luk).
Majar oq – üç xırlı oq (strela); majar – madyar, weñer.
Oqğa may toñsa – oq qollanmaylı, oğar may sürtülse, sılansa, yağılsa, qatsa.
Çınar terek – çinara, platan.
Geñleşseñ – çabuşsañ, yabuşsañ (srajatsä).
Qamalğanlar görseñ, biy bolma – qamalıwda yabuşağanlar görseñ, biydey osal bolma.
Qawğadan qaçğan bulan iy bolma – yabuşuw-çabuşuwdan, uruşdan qaçğan bulan qurdaş, üyür bolma, yuwuqluq tutma.
Majar tübek – weñer örnekli tübekdir.
İy bolma – yoldaş, qurdaş, yuwuqluq tutma, üyür bolma, tabi bolma.
Qıyğanıña boyalma – sawut çapğan, yaralağan, öltürgen duşmanıñnı qanına batma, boyalma.
Yamanlar bulan yazda xaşınma – yamanlar bulan iş görme, yuwuqluq tutma.
Yazide sağa yaw yetse – eger de sağa yaş zamanıñda yaw, daw yetse, yetişse.
Çağıwçular – pitneçiler, tilçiler.
Çali – güren, haywanlar uçun çal (zagon dlä skota).
Qapğın iş – xalbatlı, yaşırtğın iş.
Emmek – awur, awaralı, qıyın qulluq.
Şamlanğannı – sağa açuwlanıp, giziriklenip tirelgenni, çapğannı.
Aşnalar – dos-yuwuqlar, qardaşlar.
Aşgere (aşkere) – ayan, açıq, belgili.
Yazide – eger, eger de, egerdim (yesli) // (yazide - yaş, cahil zamanıñda – A.-Q. Abdulatip).