«Ah! degen bulan artmay kömekler».
Kökleni gök bulutday köp dertler Köplegen soñ, er sanına sıyarmı? Köplegen gübe dertler tarqalmay, Köl etmey geçe – gündüz qoyarmı? Geçelerdey qarañı qar içinde Gündüzlerde külep baqğan bulan tayarmı? Tayaqqaz dep, tul dünyağa soramay, Azireyil azaw bizli, dört gözlü Az bildini aziz canın ayarmı? Azireyil can alğınça geteyik, Azizlege aqsay – toqsay yeteyik. Aqsaylanı aldı busa Ana Dol, - Ol xujudan yaldap neçik öteyik?! Terik anası, ol da xuju, teren suw, Tebingen bulan bolmay, neteyik? Etmege amal da yoq, çara da. «Ah!» - degen bulan artmay kömekler, Sarğalğan betler, san miñ emmekler… Sari mayday irip bara sanıbız, Sari orusğa baylap bergen xanıbız. Xanlarıbız bizin baylap bergen soñ, Enni bizin kim bolajaq yanıbız! Qalsaq qıyın şu gawurnu qolunda, Azireyil alğınçağa canıbız. Azireyil can almağa bolamı, Yaratğan xudayından purmansız? Qaçayıq desek girme qaruw yoq, Qamalmağa oytanı talsız, ormansız… Ormanı muq, oytanı tolğan awuldan, Baş suqmağa bölegi yoq gawurdan, Amal busa, qaçmaq habas, ölmek parz. Qarışıp ölme, xuju, sawut yoq, Sawutsuz sağalaşsañ, işler boq. Dos-qardaşğa biyler yazıqsınmasa, Bizdey bolğan nasipsizge ep de yoq.
Gübe – çeltirli temir daw gölek (kolçuga, pansir, latı).
Dertler köplegen – kökürek sırlığıp, tığılıp tolğan, ornalğan ötesiz köp dertler.
Gübe dertler tarqalmay – temir gübedey awur dertler az bolmay, kemimey.
Tayaq qaz – bir ayaqdan turğan quş, qaz; qulluq kütme belsengen, hap-hazir adam demek bolmaqlı.
Tul dünya – munda: yessiz dünya demekdir.
Az bildi – amalsız, añlawsuz adam.
Yaldap – özenden qırqıp yüzüp çıqmaq.
Parz – borç (obäzannost, dolg).
Accal – ölü darajada taqsır, ayıplaw, günahlaw (nakazaniye, kara, gibel).
Azireyil azaw bizli, dört gözlü – ullu qattı bizli, dört gözü barday bek göregen.
Aqsaylanı aldı busa Anadol – munda şair Rostownu yuwuğundağı özenni wa yurtnu, şolay da Don özenni esgere.
Ol xujudan yaldap neçik öteyik – atnı yalın tutup da, qırqıp yüzüp neçik ötüp bolarbız.
Sarğalğan betler – sarğayğan, azğan betler.
San miñ emmekler – hisapsız, sanawsuz awur awaralı köp qıyınlıqlar.
Gawurnu – orusnu, dinsizni; sari orus – ciyren yüzlü (rıjiy).
Xudayından purmansız – Allahdan ixtiyarsız, iznusuz.
Qarıw (qoruw) – munda mülk, qalqı (krow) degen maʼnada.
Qamalmağa oytanı talsız, ormansız – yaşınmağa oytanı ülküsüz, tereksiz – açıq yer.
Ormanı muq – munda siyrek demek (skudnıy).
Ölmek parz – ölmek borç, ölmek qala.
Sawutsuz sağalaşsañ – sawutsuz senge-menge çıqsañ, tartışsañ, yabuşsañ işiñ boq – işiñ buzuq.
Ep de yoq – amal, çara, qutuluw yoq.