Тогъузунчу сурат

(Дездемонаны ятагъан уью.)

Эмилия. Энни нечикдир, синьора, бираз сама да йымышамадымы?

Дездемона. Ол магъа, сени уьйге йиберип, тез ят деп тапшурду. Оьзю де гьали къайтажакъ.

Эмилия. Мени йиберип?

Дездемона. Дюр… Ол шолай сюе. Эгь… Эрлер! Эмилия! Аллагьисен, гьеч дюньяда шулай эрин алдатып хыянатлыкъ этеген къатын боларму?

Эмилия. Минглер булан.

Дездемона. Кёкдеги юлдузлар булан ант ичемен чи, мен шогъар инанып болмайман.

Эмилия. Бу ишлер учун ярыкъ ярамай. Юлдузсуз гече дагъы да яхшы болур.

Дездемона. Масхараны къояйыкъ, Эмилия. Сагъа оьзюнге бютюн дюньяны берсе де, сен шолай ишни этермединг?

Эмилия. Бютюн дюнья булай увакъ ишлер учун кёп уллу.

Дездемона. Агь, къойсана аллагьисен! Барын да ялгъан айтасан!… Магъа бютюн дюньяны берсе де, мен шолай пикирни де башыма гелтирмес эдим… Яхшы, Эмилия, мени ятыв палтарымны бер, сонг гет. Геченг яхшы болсун!

Эмилия. Сиз шону булан ятывда ёлукъмай къалгъан болгъай эдигиз.

Дездемона. Ёкъ, мен олай сюймес эдим. Мен ону о къадар сюемен чи, гьатта ону оьпге-айыплары, къазабы ва абурсуз этивлери магъа татли тие… Эмилия мени гелинлик палтарларымны да ятывумну уьстюне сал — сонг гет… Эмилия, эгер

мен сенден алда оьлсем, магъа шо мени гелинлик палтарымны гийдиртип басдыртарсан.

Эмилия. Не дейсиз хари, синьора? Тыныгъыз, аллагьисен.

Дездемона. Гёзлерим ачыта, Эмилия… Айталар — гёзлери ачытагъан адам йылар дей.

Эмилия. Мен шолай сёзню эшитмедим.

Дездемона. Мен эшитдим… яхшы Эмилия. Энни гет… Геченг яхшы болсун. Мени анамны Варвара деген бир къуллукъчу къызы бар эди. О яш ва йымышакъ юрекли бир къыз эди. Варвара ва бир яш улан бир-бирин сюйген эдилер. Сонг шо улан ону ташлап гетди. Эсимде, Варвараны бир йыры бар эди. Гьар заман о йыр ону юрегинде авур къайгъыланы суратландыра эди. Языкъ къыз! Оьлегенде де ахыргъы тынышы булан шо йырны айта эди. Бугюн шо йыр, нечик де недесе, мени эсимде къалгъан. Сав гюн йырны йырламагъа сюемен. (Йырлай.)

Тав башында оьсген оьксюз бир наратны
Терегинде къалгъан бир япыракъман.
Сам ел урду бутагъындан айырды.
Энни топуракъ уьстде мен бир хола топуракъман.
Оьзен магъа лайла этсин, туман ушансын,
Заман яш башымны мурат етмей агъартды,
Сонг гюнюнде мен узакъ кант этмеймен,
Къадар къысгъа оьмюрню де кёп гёрдю.

(Йыр бите.) Гьей, кёкню, ерни яратгъан Тенгирим! Аллагь! Сен магъа янгылышсам, яманлыкъ гёрмеге ва гьар бир яхшы затдан яхшылыкъ гёрмеге кёмек эт. Тенгирим! Сагъа сыйынаман. (Гелип ята.)

(Отелло янгыз.)

Отелло. Мени азиз гёгюрчюнюм! Сени сюйгенинг оьлдю! Бир аздан сени де терен солувунг гесилежек. Гелемен сени назик-зариф юрегингни урувларын тындырмакъ учун. Энниден сонг сени сигьрулу гёзлеринг мени юрегимни йымышатмагъа болмас.

Сени намарт сюювюнг булан дамгъалангъан ятывунг сени хыянат къанынга да боялажакъ.