Бешинчи сагьна

(Капулетлени уьюнде зал. Синьора Капулет ва Дигиза геле.)

Синьора Капулет. Муна ачгъычлар. Чыгъар татлиликлени!

Дигиза.

Олар каба хурма ва гьайва сюе,
Шолар булан пирожныйлер!

(Капулет геле.)

Капулет.

Гьы, тез бол!
Чалт айлан! Хоразлар эки къычырды.
Занг урулду… Гьали сагьат уьч.
Анжелика! Бир аш уьйге барсана,
Гьеч бир затны къызгъанмай, аш этсинлер.

Дигиза.

О, гьалек гиши! Яхари, ятыгъыз,
Булай сиз гече юхламай турсагъыз,
Воллагь, аврурсуз эртен.

Капулет.

Ёкъ, юхламан!
Мен бу ишден де гиччи иш саялы
Чыгъаргъанман кёп гечелер юхламай…
Аврумадым чы…

Синьора Капулет.

Дагъы! Сен оьз заманынгда
Лап айтылгъан чычгъан тутувчу мишик эдинг.
Гьали буса шулай ишлерде сени
Рагьат юхлама къоймакъ шо мени ишим.

(Синьора Капулет ва дигиза гетелер.)

Капулет. Къара чы сен гюнчюлюкге! Къара сен!

(Аш ва карзинкалар булан къуллукъчулар геле.)

Гьей, яш! О недир?

Биринчи къуллукъчу. Ашбазгъа элтемен, мессир, оьзюм де билмеймен бу недир.

Капулет. Элт чалт-чалт!

(Биринчи къуллукъчу гете.)

Гьей, къачакъ! Тез гелтир мунда
Къуру агъач… Пиетрону чакъыр, ол сагъа
Шону ерин гёрсетер.

Экинчи къуллукъчу. Шонда йимик баш, мессир, менде де бар. Пиетрону инжитме негер тарыкъдыр? (Гете.)

Капулет.

Яхшы жавап берди! Агь, итден тувгъан!
Ай, агъачны гесме устасы! Гьай, Аллагь!
Бир гюн!… Граф да гелир музыка булан:
Шолай сёз берди… Она геле тура
Музыка эшитиле. Гьей, Дигиза!
Къатын! Гьейлер! Дигиза! Гьы, гьали тез!

(Дигиза геле.)

Бар, Жульеттаны уят, тез гийиндир!
Мен барайым Парисни къаршылама.
Гьы, гьы, хозгъал! Тез бар! Гиев де гелди,
Бар деймен чи тез сагъа! Чалт-чалт юрю!

(Гете.)