Алтынчы сагьна

(Фра Лоренцону кельясы (гьужрасы). Лоренцо ва Ромео гелелер.)

Лоренцо.

Аллагь шу жагьиллени ишин гючлю эт.
Болмасын дагъы, я Аллагь, къайгъылы
Оьмюрюнде шуланы шат бирлиги!

Ромео.

Амин, амин! Гелип гетеген къайгъы
Сюйгеним береген ярыкъ шатлыкъдан
Авурлукъ гелмеге болмас. Тек сен байла
Оьмюрюбюзню сыйлы дуада.
Сонг гел оьлюм, — сююмню оьч варканаты.
Алсам Жульеттаны, — оьлсем де ярай.

Лоренцо.

Гючлеп алгъан шавкъ гюч булан битежек.
Шатлыгъында — шогъар оьлюм; ол янар.
Оьбюшде, тюбек от ва чыракъ йимик.
Балны татлиси де бир-бирде мынгый,
Ахырда ол къамашдыра тишлени.
Дазувлу сююмюнг етер оьмюрге.
Досум! Аста барсанг — гетерсен йыракъ.

(Жульетта геле.)

Муна синьора. О! не енгил юрюй,
Гьеч бир заман шулай юрюш гёрмеген.
Язны къызгъан гьавасында саллангъан
Мия авдан ашналар юрюп гетер.
Енгилсен, пана дюньяда, талайыз!

Жульетта. Салам сагъа, мени ругьани атам!

Лоренцо. Бизден сени рази къаршыласын Ромео.

Жульетта. Шону разилиги тегин болмасын деп —

Сагъадай шогъар да салам беремен!

Ромео.

Жульетта! Шу сююнчюнг мендегини
Оьлчевюнде буса, — сен шону менден
Гючлю айтмагъа боламысан, — татли эт
Солумагъынг булан бютюн гьаваны!
Музыкасы сёйлевню, бирикгенде
Гьатсыз шавкъ да бизин алгъан
Толу гармонияда гётерсин!

Жульетта.

Сёз булан бай тюгюл къуванч, — иш булан
Безенмекден оьктем тюгюл, — етмекден
Ёкъсул — даим малын гьисап этеген.
Сююмюм инг дазувуна етишген,
Кёп девлетни. — Ол гьисабын тас этген.

Лоренцо.

Юрюгюз чю, ишни тамам этейик.
Сыйлы шу килисаны алдында
Экигиз де бирлик завхгъа гиргинче
Сизин янгыз къоймагъа болмайман чы.

(Гетелер.)