Бешинчи сагьна
(Капулетни баву. Жульетта геле.)
Жульетта.
Дигизам барагъанда тогъуз эди.
Ярым сагьатдан къайтарман дей эди…
Тапмагъандыр, балики… Ёкъ, ёкъ! Болмас!
Гамиш йимик авур Дигизам да! Агь!
Сююм элчилер ойлар болгъай эди;
Олар тавлардан чарсны къувалайгъан
Гюнню шавлаларындан да тез уча.
Чалт къанатлы Купидон учагъандай.
Сююм бара гёгюрчюнлеге минип.
Оьрюне минип гюн чабып гюндюзню…
Тогъуздан он эки сагьат, — кёп азап
Ол да ёкъ… Ону къаны жагьил буса,
Мендей напсы да буса, чабар эди
Топ йимик енгил болуп, сонг мен ону
Сюйгениме, ол да магъа атып
Сёйлер эдик: тек къартлар, оьлюлердей, —
Салпан, чабан ва авур къургъашындай.
(Дигиза ва Пиетро геле.)
О, Аллагь! Муна… Дигизам, шекерим!
Гьы, хабар? Гёрдюнгмю? Я, йиберсана
Тез-тез адамынгны.
Дигиза. Чыкъ, Пиетро! Эшикни алдында токъта.
Жульетта.
Гьы, не хабар, эмчек анам! Вай Аллагь!
Яман хабар буса да — айт шат юз булан:
Яхшы хабарны сююнч музыкасын
Къайгъылы юз булан негердир бузмакъ?
Дигиза.
Уф! Гьалым… Къой аз тыныш алма.
Бар сюеклерим авруй… Кёп йыракъ ёл!
Жульетта.
Яхшы хабарны сенден алмакъ учун
Берир эдим сагъа сюеклеримни…
Гьы, абам, айт гьали тез, айт тез, гьы тез!
Дигиза.
Вай Аллагь! От къабунду сагъа! Ярай
Бир минут чыдамагъа: айтаман чы
Гьы, тынышымны мен алып болмайман.
Жульетта.
Тынышынгны алып болмайман деме:
Бар чы дагъы сени бираз солувунг.
Багьанасын, сабурлугъун айтмакъ чы
Гелтиргенингни сёйлемекден узакъ.
Яхшы хабар гелтирдингми, я яман? —
Тез-тез айт: сонг бойлап хабарны айтарсан.
Тек сен бир айт — шо яхшымы, я яман.
Дигиза. Тюзюн айтсам: сен сайлагъан уланынг булан сени къутламагъа герек! Шондан дагъы яманын сиз излеп де табып болмас эдигиз… Ромео… Ёкъ, шолай тюгюл! Озокъда, ону бети, гелиши. Кёп арив улан, гьюрметине айтабыз, исбайы да дюр, гьатта гьайран къалырсан, къоллары, аякълары, бою — оланы сёйлемеге де тарыкъ тюгюл! Тек шогъар тенг гелеген уланны да тапмайман!… Тарбиясы кёп яхшы деп айтмагъа боламан; тек къозу йимик мангуш. Сени къысматынгдыр дагъы: алгъыш тиле!…
Гьы, сиз, ашадыгъызмы?
Жульетта. Ёкъ, ёкъ! Я, шуну алдын да биле эдим! Не деди мени алмагъыны гьакъындан?
Дигиза.
Огь, ярылсын мени башым!… Не башдыр
Шу мени башым? Солкъунлай вавуллап,
Йигирма гесекге чартлама гьазир,
Белим олай авруй ва къувуллай! Огь! вай, хужу къалгъыр,
мени белим, белим!
Аллагь сагъа диван этсин! — мени сен
Барчы-гелчи этдинг… Шулай оьлсем де недир?
Жульетта.
Воллагь, Дигизам, сени къызгъанаман!
Азиз, абам! Айт, айт дагъы тез магъа!
Не буюрду магъа этмеге сюйгеним?
Дигиза.
Сени сюйгенинг, таза асил улан,
Инсаплы, тарбиялы, гьюрметли,
Боюнман намусуна… Я, синьора
Къайдадыр?
Жульетта.
Анам? Онда оьзюню уьюнде.
Къайда болур дагъы? Я сен тамаша
Соравгъа юлдуруп жавап бересен:
«Сени сюйгенинг таза асил улан» —
Сонг бирден «синьора къайдадыр» дейсен.
Дигиза.
Агь, мени Аллагьымны нюрлю анасы!
Нечик бирден яллады? Не яхшы сен
Авруйгъан сюеклеримни эмлейсен!
Хабарны артындан барыгъыз оьзюгюз!
Жульетта. Я узатма… Не айтды сагъа Ромео?
Дигиза. Бугюн гебин къыйма бармакъ гьакъындан?
Жульетта. Дюр.
Дигиза.
Бугюн Фра Лоренцону ягъына.
Баражакъсыз бирче Ромео булан.
Ол да сизин шогъар къатын этежек.
Гёр, нечик яякъларында къан ойнай!
Гьар сёзюне ялын атып пухуллай!
Килисагъа барыгъыз: мен де барып
О бир якъдан аркъан батгъыч салырман.
Шондан сени аявлунг минип гелир
Сени къарлыгъач уянга бу гече.
Мен сизге гьали къуллукъчу болгъанман.
Сени уьстюнге де тюшежек бу гече
Айтар йимик алай енгил юк тюгюл.
Мен барайым ашама… Сени кельянга.
Жульетта. Савбол! О, тез, тез шавкълу бир йыбанчгъа!