«Dewür-dewür, pitne dewür zamanda».
Gözeldirik salğan bulan göz görmey, Göz işlemey, baqğan bulan yüz bermey. Günler bara köp anadaş yüz görmey. Anadaşlar bulan yuwuq sırdaşğa Haşıqlıqda söz qoymamaq erdendir. Haşıqlağa «ay-amansız» ay gelmes, Didarlağa tun-tumansız gün bermes. Didarlar bulan, way, amansız, gün getse, Teñlisine er salamın muñ bermes. Er salamın muñ bermegi nedendir? Anadaşlar az görünegen yerdendir. Anadaşğa baqmay can çıqmay. Yañızlıqda söz qoymamaq erdendir. Awrumay arslan betin ağartıp, Sır qaramay sala sanın sarğaltıp, Kökürekler türlü çerden tolğan soñ, Zar-zigerli qayğı qopmaq birdendir. Köküregi xasa küllüler Qızbayldağa dert tutmağan tüllüler. Şawalarda seyir etmek kürdendir, Şawla bergen şam çırağı nürdendir. Şawlası yoq günler bara tunuqğa, Şay, qara gün, döndük xasa-mamuqğa. Yaratğanım süyse bizin qaytarır Özdenleri qulğa döngen Qumuqğa. Özdenleri qara qulğa oşağan, Özeñiler basğan ayaq boşağan, Özeñige qaytğan ayaqlım, Arğumağı aytabanlı tuyaqlım… Atolular özdenlerin taşlağan, Qara qulğa döndürmege başlağan. Şawla bergen şam çırağı söngen soñ, Şat yürekden şatlıq getmey netejek, Yarnı yimik boynubuzğa mingen soñ, Mingen busa boynubuzda yar yimik, Misginleni dünyası muq, tar yimik, Dewür-dewür, pitne dewür zamanda Dewren getgen günjuwaqda qar yimik. Qol panarın gesek dewür sürmese, Dos-qrdaşnı ayda-yılda görmese, Aşnalağa haşıq salam bermese, Ananaylar bulan günün oñ görmes, Awadanlıq bulan canın soñ bermes. Azireyil can almağa gelgende, Hökünçlü qul arsar bolmaq gertidir. Qazağımnı qayğıları qopğan soñ. Kökürekden köplep çıqğan dertidir.
Pitne dewür – başalman, başdan-baraq, bulğawur, pakarsız, pitneli, qawğalı, qalmağallı, pasat zamanda (w smutnıye wremena).
Anadaş yüz görmey – dos-qardaşnı betin görmeyli.
Sırdaş – süyegen, inanağan adamı, dosu, sır çeçegen adamı.
Söz qoymamaq – söz aytmamaq, söz aytmay qoymaq.
Didarlar – gözler.
Tun-tumanlı gün – qara, tuñlu tumanlı, çarslı gün.
Muñ – paşman, talçıqlı (skorbnıy, peçalnıy).
Sır qaramay – sıra qaramay, //birtde, bütünley qaramay, oylamay.
Türlü çerden – munda türlü dertden, qayğıdan, awruwdan demek.
Kökürekler türlü çerden tolğan soñ – töş, kökürek köp dertlerden tolğan soñ.
Zar-zigerli qayğı qopmaq – başına awur, dertli qayğılar, talçıqlar tüşmek.
Köküregi xasa küllüler – köküregi, yüregi taza köpler, adamlar.
Tüllüler – uyawlar, uyawlular, esin tas etmegenler.
Şawa – Babayurt rayonda Terik boydağı yurt, şair şonda bir waqti yaşama da yaşağan, yır yarışlarda ortaqçılıq etgen.
Seyir etmek – munda: kürlükden gezew, yıbaw etmek demek.
Şam çırağı – ullu geng yarıqlı lampa (lampada, lüstra).
Şay, qara gün, döndük xasa-mamuqğa – adarşay bizge, xasa-mamuqday boşadıq, ağardıq, tawşaldıq.
Yaratğanım – Qudratlı Allah (Wsemoguşiy Twores).
Özden – azat, öz ixtiyarlı xalq qatlawu.
Qara qul – xolop.
özeñi – yerni ayınını ayaqbasağan temiri (stremä sedla).
Arğumaq – sıylı cınslı, bek çabağan, yügürük at (argamak).
Atolu – aytılğan, maqtalğan, belgili, aburlu adam (znat, znatnıy, blagorodnıy).
Misginleni dünyası muq, tar yimik – yarlılanı, amalsızlanı, paqırlanı dünyası, yaşawu awur, tarlıqda, talçıqda.
Dewür-dewür, pitne dewür zamanda – bu qawğalı, qalmağallı, erişiwlü zamanda (smutnıye wremena).
Dewren getgen qar yimik – munda: kirlenip, esgilenip, irip getgen qar yimik.
Qol panarı – qısmatı, talihi degen maʼnada.
Dewür sürmese – yaşaw, ömür görmese, yaşamasa.
Muq – yoqluq, mahrümlük (misal uçun, haqılğa muq – haqılı yoqluq).
Awadanlıq bulan canın soñ bermes – teginlik bulan, alğasap, canın soñ bermes.
Arsar bolmaq – boşamaq, qorqmaq, büdüremek, tartınmaq.
Qayğıları qopğan soñ – qayğı-dertge köp tarıp örçükgen soñ.
Kökürekden köplep çıqğan dertidir – teşip, yarıp çıqğan talawudur.