Гиришив

Бу китапчаны белгили журналист ва язывчу Солтанбек Солтанбеков язгъан. Ол мундан алда яшлар учун кёп хабарлар, ёмакълар, шиърулар язып газетлерде ва китапларда чыгъаргъан. Уллу къумукъ кочап Ал-Къылычны гьакъында да китап язып, къумукъ ва орус тиллерде чыгъаргъан.

Бу китапчада яшланы иштагьландырагъан, муалимлер де масхара-оюн къайдаларда къоллама болагъан, уста кюйде язылгъан шиърулар, сёз тагъымлар, чечеген ёмакълар ва оьзгелери бар. Къумукъ тилни байлыгъын ва гёзеллигин билмек учун яшлагъа ва гьатта муалимлеге де бу китапча кёп кёмек этме бола.

Китапча дёрт бёлюкге бёлюнген. Гьар бёлюкде бир ёрукъда яратылгъан гьар тюрлю асарлар бар.

Бир-бир тереклени, гюллени, отланы атларын яшлар чы нечик де, уллулар да билмей, къумукъ тилни байлыгъындан, уллу сёз хазнасындан кёп сёзлер унутулуп бара. Китапча яшлагъа шоланы уьйренме де кёмек этежек.

Савлай алгъанда, бу китап яшланы сёз байлыгъын артдыражакъ, билимине билим къошажакъ, гьатта гьисапны уьйренме де кёмек этежек, айрокъда китапдагъы санавлар къолланып къурулгъан оюнлар гиччипавланы кепине гележек, яшлар бавларыны, башлапгъы классланы тарбиялавчуларына, муалимлерине классда ва классдан тышда юрюлеген ишлерде де кёмек этежек.

Гьали яшланы охутувда ана тилден ва адабиятдан китаплар етишмейгенни эсгерсек, бу китапны агьамиятлыгъы дагъыдан-дагъы арта. Мен кёп сююп шу китапчаны яшлагъа ва муалимлеге таклиф этемен.

Сайитов Абдулкерим Магьамматович, Анжикъалада педагогик кадрланы билимлерин артдырагъан институтну ана тиллер кафедрасыны мудири, доцент.