Экилер

Авуз – бир, къулакъ – эки, къычырып сёйлеме.

Яда: Эки тынгла, бир эшит, – деп уьйретер уллулар гиччилени.

Эки авузлу (юзлю) адам башын тас этер, – деп де айталар.

Адамланы аслу санлары экишер бола. Масала, эки къулагъы, эки къолу, эки буту, эки гёзю, эки оьпкеси, эки бюйреги ва шолай башгъаларына къошулуп эки юзлюсю де бола.

Къушланы барысы да эки къанатлы, эки аякълы бола.

Эки яртыдан бир сав да къолай, – дейлер.

Экевге аш этген оьзю де тояр.

Эки аязбаш бир таракъны уьстюнден ябушгъан.

Бир башдан къолайдыр эки баш.

Биревге экев аскер чакъы болуп гёрюнер.

Эки яман дост болса, арадан уьч гюн оътмей урушар.

Абусупиян Акаев язгъан юз суаллы Маликаны хабарында да сиз булай лакъырны охума боласыз:

Къыз: Эки затгъа етишдиреген эки зат недир?

Алим: Сабурлукъ – муратгъа етишдирер, экинчилей, баргъа рази болуп турмакъ да – байлыкъгъа етишдирер.

Экевге экев – болар дёртев. Биз буса, дёртлерден алда гёчейик «уьчлеге»!