Бирлер

Бир – бирдир! – деп сан этмей къоймагъыз! Яшавда бары да зат бирден башлана.

Бир буса да пир^✻ болсун! – деп де айталар.

Яхшы яшлар бир минутун да бош йибермес! – деп де билмей айтылмагъан.

Бирлеге байлавлу дагъы да шулай бир нече айтывлагъа да тергев берейик:

Биревню яманы мингевге^✻ тиер.

Бирев-биревге дарман да дюр, агъу да^✻.

Йырчыгъа тарыкъ бир саз^✻ да, бир сёз де.

Баъли байлыкъ – бир айлыкъ.

Биревню ким экенин билме сюйсенг, ону уьюрлери^✻ кимлер экенни башлап бил.

Яда:

Бир хапгъан булан бёрю де тоймас, дагъы хапмагъа къойчу да къоймас.

Бир къояр, эки къояр, гьаман къоюв боламы?

Бирлеге байрам, бирлеге гьайран^✻.

Авлия бир ишни эки этер, шону да ярты этер.

Халкъ сынавларында дагъы да булай айтыла:

Гюзде бир сагьатны ичинде къар да, янгур да явма бола.

Майсанда бир явса – байсан, эки явса – гъогъойсан, уьч явса – урусбайсан^✻.

Дюнья аламны, адамланы, гьайван-малны, жан-жаныварны, бары да затны яратгъан бир Аллагьдыр.

Магьаммат пайхаммар, сал Аллагьу аллайгьи ва салам да, бирдир.

Кёкден Магьаммат пайхаммаргъа, аллайгьи салату ва ссалам, тюшген Къуран да бирдир.

Бусурманлар гьаж къылма барагъан Аллагьны сыйлы уью Кааба да бирдир.

Бирден экини тайдырса, нече къалар? – деп сорагъанда:

– Сыфыр! – деген бир яш. О тюз айтгъанмы? (Бирден эки де къолай.)

– Тюгюлмю дагъы шолай? (Муалим англатыв берип сёйлей), – дюр буса, гелигиз «экилер» булан да таныш болайыкъ. Экилени сырларын да башларыбызгъа къуяйыкъ!