Уьчюнчю сагьна

(Жульеттаны ятыв отаву. Жульетта ва Дигиза гелелер.)

Жульетта.

Агьа! Шу опуракъ барындан да яхшы.
Булай иш бар, аявлу эмчек анам!
Тилеймен. Бу гече мени янгыз къой.
Этген гюнагьымдан кёк гечмек учун
Магъа гьали кёп дуа этмеге герек.
Билемисен, мени гюнагьым авур.

Синьора Капулет. Гьы, не этесиз? Сизге кёмек тарыкъмы?

Жульетта.

О, ёкъ, синьора! Биз гьали сайладыкъ.
Гиймеге герек опуракъны айырдыкъ…
Изну беригиз, мен янгыз къалайым.
Сизин булан гече дигиза къалсын.

Билемен, сизин ишигиз гьали кёп
Ва алгъасав.

Синьора Капулет.

Гьы, геченг яхшы болсун!
Ят, къызым, рагьат юхла тёшегингде…
Гьали сагъа рагьат болмагъа герек.

(Синьора Капулет ва Дигиза гетелер.)

Жульетта.

Эсен туругъуз… Къачан гёрюшюрбюз
Бир Аллагь билер… Тамаша ва сувукъ
Къоркъув оьте бютюн тамурларымдан,
Яшавумну иссилигин бузлата.
Чакъырайымы шоланы къайтарып?
Эмчек анам. Тек ол мунда не этежек?
Мен герекмен бюдюревсюз оюн ойнама…
Гел, дарман…
Бу да ишин этмесе, сонг не этермен?
Сонг мени чи тангала эрге берир!
Ёкъ, ёкъ!

(Ястугъуну тюбюне бичакъ сала.)

Муна бу мени къутгъарыр… Шунда тур!
Шу Лоренцо берген дарман агъу буса,
Мени оьлтюрмекге амал эте буса, сонг не этермен?
Ол да биябур болур
Ромеома оьзю мени къошгъангъа!
Къоркъаман… Ёкъ… Шолай болма ярамай!
Лоренцо бир шайых гиши, гьеч шек ёкъ.
Огъар яман ёрамагъа ярамай…
Ромео мени къутгъарма гелгинче
Табутда мен уянсам, сонг не этермече?
О, къоркъунч! Бюдюревлю йыртгъыч авзундан
Таза гьава бермейген къабур кёрде
Тунчугъуп оьлсем Ромео гелгинче?
Сав къалсам да, мени эрге бермек де
Оьлюмге бермек булан тенг тюгюлмю?
Шо къабур склепде чи дагъы юз йыллар
Мени ата-бабаларым сакълана…
Шонда гьали янгы оьлген Тибалтны
Къан боягъан сюеги чирий тура.

Шонда, дейлер хари, гьар гече ортада.
Туруп оьлюлер юрюйлер… Ёкъ, ялгъан!
Бирден кёп тез уянсам да ярай чы…
Шу чиривню, сасыву, гьеч бир гиши,
Дели болмай гьеч эшитме болмайгъан,
Тамурлары булан тюпден суврулгъан
Жагьаннемни зигерине ошайгъан
Бир огьуллав чыгъара… О, уянсам.
Шо бары да къоркъунчланы ичинде
Гьакъылдан тайышмай турмакъ болурму?
Бабаланы сюеклерин атылтып
Ойнарман. Оьлген Тибалтны уьстюнден
Акъ гебинни алып, мен гиермен.
Сонг жинленип, бирини бутун уьзюп,
Токъмакъдай силлеп уруп оьз башыма,
Шу такъамны уватып къоярман…
О! муна оьлген Тибалт геле тура:
Ромеону артындан шу айлана,
Ромео да шогъар чанчгъан къылычын…
Гьей! Токъта, токъта, Тибалт!… О Ромео!…
Муна дарман… Савлугъунгдан ичемен!

(Иче ва тёшегине ята.)