Экинчи сагьна

(Капулетлени уьюндеги отав. Капулет, синьора Капулет, Дигиза ва къуллукъчулары геле.)

Капулет (къуллукъчугъа сиягьны берип). Шунда язылгъанланы барып чакъыр. (Къуллукъчу гете.) Сен буса, лётю, барып гелтир мунда инг де яхшы йигирма ашбаз алып.

Экинчи къуллукъчу. Мен чи хари осалларын алып гелтирмесмен, мессир! Неге тюгюл, мен, олар бармакъларын яламагъына къарап алырман.

Капулет. Не билерсен дагъы сен шондан.

Экинчи къуллукъчу. Я, мессир, оьзюню бармакъларын яламагъан ашбаз осал бола чы дагъы; яламай буса ашы татывсуздур. Шону учун мен оьзлени бармакъларын яламайгъан ашбазланы тутмасман. (Гете.)

Капулет.

Гьы, бар!
Къонакъланы биз къапул къаршыламайыкъ.
Гьы? Къызым баргъанму экен Лоренцону ягъына?

Дигиза. Неге бармай? Ай-гьай баргъан.

Капулет.

Ол шону чу эс тапдыргъандыр хари…
Огь, нечик башалман хасиятлыдыр!

(Жульетта геле.)

Дигиза.

Сиз къарагъыз, насигьатдан бу
Гьали нечик шат болуп къайтып геле.

Капулет. Гьы, къайда эдинг, мени башалман къызым?

Жульетта.

Сизге ва сизин буйрукъларыгъызгъа
Къарыв къайтаргъаныма товба этмеге
Баргъан эдим. Падре Лоренцо магъа
Аякъларыгъызгъа йыгъылып геч деп
Сизден тилемеге тапшурду.

(Тобукъларындан туруп)

Гечигиз, дагъы, мен сизден тилеймен
Дагъы сизге гьеч къаршы сёйлемесмен.

Капулет.

Гел, етишдир шу хабарны графгъа
Тангалокъ сизин эр-къатын этермен.

Жульетта.

Фра Лоренцо кельясында гёрдюм
Синьор графны. Огъар мен сёйледим
Бажаргъан гьалымда илиякълы,
Оьзюмню къызлыкъ инсабыма гёре.

Капулет.

Гьы, сююндюм! Кёп яхшы! Гьы, тур къызым!…
Шолай болмагъа герек… Мен графны
Гёрмеге герекмен (къуллукъчугъа)
Бар тез артындан!
Гертилей де, асил адам Лоренцо,
Лап алтын, шагьаргъа кёп пайдалы.

Жульетта.

Эмчек анам! Юрю юхлайгъан отавгъа,
Кёмек эт магъа гийимлер сайлама.
Тангала мен инг яхшысын гиейим.

Синьора Капулет. Ёкъ, ёкъ! Хамисгюн гиерсен… гьали тез.

Капулет. Гьы, къой… Бар сен шуну булан, дигиза! Гьы, тангала килисагъа…

(Жульетта ва Дигиза гетелер.)

Синьора Капулет. Бар ишлени онгармагъа болурбуз? Гече бола тура.

Капулет.

Гьы, тын! Мен оьзюм
Бар ишлени аварасын алайым,
Сонг бары ишлер майланып дёгережек…
Сен парахат бол, къатын. Сен оьзюнг де
Бар, Жульеттаны отавуна къара.
Къайсы опуракъ шогъар гийме ярашар
Мен гьали юхламасман. Сен мени къой!
Мен бугюн сени орнунга болурман! Гьей!
Къайда тозулдугъуз?… Болса мен оьзюм
Тангала болажакъ ишни билдирме
Граф Парисни ягъына барайым!
Гёр, къызым эс табып гелмеги булан,
Нечик шат болуп къалды мени гёнгюм!…

(Гете.)